Azərbaycanlı və erməni ekspertlərin “Sülh körpüsü” təşəbbüsü çərçivəsində Yerevanda  keçirilməsi planlaşdırılan görüşü təxirə salınıb.

APA-nın məlumatına görə, Azərbaycan tərəfi hazırkı mərhələdə görüşün keçirilməsini məqsədəuyğun hesab etmir.

Ermənistan Mətbuat Klubunun rəhbəri Boris Navasardyan “Azadlıq Radiosu”nun erməni xidmətinə bu məlumatı təsdiqləyib. Onun sözlərinə görə, Azərbaycan tərəfi görüşün “gərginlik səngiyənədək” keçirilməməsini təklif edib.

“Bu vəziyyətdə görüşmək, qarşılıqlı anlaşmaya nail olmağa çalışmaq və ictimai-siyasi, informasiya mühitində formalaşmasını istədiyimiz ab-hava barədə razılaşmaq lazım idi. Görünür, Azərbaycandakı tərəfdaşlarımız bu mərhələdə dialoqu məqsədəuyğun hesab etmirlər”, - Navasardyan deyib.

Ermənistan və Azərbaycan vətəndaş cəmiyyəti nümayəndələrinin qarşılıqlı səfərləri 2025-ci ilin avqustunda Vaşinqtonda keçirilən sammitdən sonra başlayıb. Həmin sammitdə sülh sazişinin mətni paraflanıb. Həmçinin Azərbaycanın Naxçıvanla Ermənistan ərazisindən keçməklə əlaqəsini nəzərdə tutan “Tramp marşrutu” adlı nəqliyyat xətti üzrə razılaşma əldə olunub.
Son qarşılıqlı səfərlər Tavuş-Qazax istiqamətində delimitasiya edilmiş sərhəd hissəsindən keçidlə həyata keçirilib. Birinci Qarabağ müharibəsindən bəri bağlı olan quru sərhədin bu hissəsində keçid Azərbaycanın quru sərhədlərə tətbiq etdiyi məhdudiyyətlər qüvvədə olduğu şəraitdə baş tutub.

Görüşün təxirə salınması Qarabağdakı monastırların mənşəyi ilə bağlı yaranmış mübahisələr fonunda baş verib. Sentyabrın ortalarında Azərbaycan prezidentinin köməkçisi Hikmət Hacıyev xarici diplomatlarla Qarabağa səfəri zamanı bəzi monastırların erməni deyil, Qafqaz Albaniyasına aid olduğunu bildirib. Bu açıqlamalar Ermənistanda tənqid olunub.

Bununla yanaşı, Ermənistan Xarici Kəşfiyyat Xidmətinin direktoru Kristinne Qriqoryan sentyabrın 23-də Bakıda keçirilən IV Bakı Təhlükəsizlik Forumuna qatılıb. Forum Azərbaycan Dövlət Təhlükəsizliyi Xidməti tərəfindən təşkil olunub.

Sentyabrın 22-də Azərbaycan Ermənistanı Kəlbəcərdə yerləşən və Ermənistanda Dadivank kimi tanınan Xudavəng monastır kompleksindən xaçlar, zənglər və digər əşyaları götürməkdə ittiham edib. Azərbaycanın mədəni irs qurumunun rəhbəri Səbinə Hacıyeva bildirib ki, ölkə 2025-ci ilin oktyabrında İnterpolun Oğurlanmış İncəsənət Əsərləri Bazası vasitəsilə müraciət edib. Onun sözlərinə görə, əşyalar İnterpol üzvü olan dövlətlərdən birində aşkar edilərsə, bu müraciət onların qaytarılmasını asanlaşdıra bilər.

Ermənistanın hakim “Vətəndaş müqaviləsi” partiyasının üzvü Eduard Ağacanyan isə Erməni Apostol Kilsəsinə aid olduğunu dediyi əşyaların Ermənistana gətirilməsini “milli sərvətin qorunması” kimi qiymətləndirib.