Azərbaycandan olan, lakin mühacirətdə fəaliyyət göstərən vətəndaş cəmiyyəti təşkilatları Avropa Şurası (AŞ) institutları və üzv dövlətlərinə müraciət edib.

Sentyabrın 22-də yayımlanan bəyanatda təşkilatlar AŞ institutları və üzv ölkələrini Azərbaycan hökumətinin üzvlük öhdəliklərini yerinə yetirməsi üçün addımlar atmağa çağırıblar. 

Müraciəti Müstəqil Hüquqşünaslar Şəbəkəsi, Xəzər Tədqiqat və Analiz Mərkəzi, Açıq Azərbaycan Təşəbbüsü, "Free Voice Collective" və Demokratik Təşəbbüslər İnstitutu imzalayıb. 

"Biz - Azərbaycanın vətəndaş cəmiyyəti təşkilatları Avropa Şurası institutlarını və üzv dövlətləri Azərbaycan hökumətinin üzvlük öhdəliklərini sistemli şəkildə pozmasına və təşkilatdan çıxmaq hədələrinə qarşı prinsipial cavab verməyə çağırırıq. Bu çağırış həm Azərbaycanda insan hüquqlarının müdafiəsi, həm də Avropa Şurasının əsas dəyərlərinin qorunması zərurətindən irəli gəlir", - deyə bəyanatda qeyd olunub.

Təşkilatlar bildirir ki, Azərbaycan hakimiyyəti ölkədə insan haqları sahəsindəki "problemləri aradan qaldırmaq əvəzinə, Avropa Şurasının nəzarət mexanizmlərini suverenliyə və ərazi bütövlüyünə müdaxilə kimi təqdim edərək təşkilatın institutlarının legitimliyini şübhə altına alan siyasət yürüdüb, onların fəaliyyətini qanunsuz müdaxilələrlə məhdudlaşdırmağa çalışıb." 

Müraciətçilər “kürü diplomatiyası” kimi tanınan korrupsiya və qanunsuz təsir praktikalarının AŞ-nin institusional bütövlüyü üçün ciddi sınaq olduğunu vurğulayıblar: “Avropa Şurasına qarşı gözdən salma kampaniyaları, təhqiramiz ritorika və təşkilatdan çıxmaq hədələri bu gün də davam edir. Halbuki Avropa Şurası Azərbaycanın ərazi bütövlüyünü və məcburi köçkünlərin hüquqlarını ardıcıl dəstəkləyib, Qarabağ münaqişəsinin beynəlxalq hüquq çərçivəsində həllinə çağırıb”.

Vətəndaş cəmiyyəti təşkilatları Azərbaycanda hazırda azı 328 siyasi məhbus kimi tanınan şəxsin olduğunu xatırladıb. 

"Vətəndaş cəmiyyəti nümayəndələri, jurnalistlər və siyasi fəallar 10-15 ilədək ağır həbs cəzalarına məhkum edilir və repressiya həbs yerlərində də davam edir. 2026-cı ilin ilk altı ayında siyasi məhbuslara qarşı işgəncə və pis rəftar, o cümlədən qadın siyasi məhbuslara qarşı cinsi qısnama halları artıq ayrı-ayrı hüquq pozuntularının fövqünə keçən, insan ləyaqətini alçaldan bir vəziyyət yaradıb. Həbs yerlərində adekvat tibbi xidmətə çıxışın təmin edilməməsi, siyasi məhbuslara və onların ailələrinə qarşı təzyiqlərin davam etməsi vəziyyəti daha da ağırlaşdırıb. Bu qeyri-insani repressiya siyasəti təcili və adekvat beynəlxalq reaksiya tələb edir", - deyə qeyd olunub. 

Təşkilatlar AŞ Parlament Assambleyası, Nazirlər Komitəsi və baş katibini Azərbaycandakı "insan hüquqları böhranını gündəmdə saxlamağa, siyasi məhbusların azad edilməsi, insan hüquqları pozuntularının sənədləşdirilməsi və gələcək hesabatlılığın təmin edilməsi üçün əlaqələndirilmiş institusional addımlar atmağa" çağırıblar.