İctimai-siyasi xəbərlər
Prezident niyə hüquqşünasları aidiyyətləri olmayan sahələrə nazir təyin edir?
Foto/kollaj: Toplum TV
Prezident İlham Əliyev fevralın 10-da Rəşad İsmayılovu ekologiya və təbii sərvətlər naziri təyin edib.
2024-cü ilin avqustundan bu vaxta qədər ekologiya və təbii sərvətlər nazirinin birinci müavini olmuş R.İsmayılov hüquqşünaslıq ixtisası üzrə Bakı Dövlət Universitetinin bakalavr və magistr pillələrinin məzunudur.
2000-ci ildə əmək fəaliyyətinə başlayan R.İsmayılov karyerasının əksər hissəsini özəl və dövlət müəssisələrində hüquqşünas vəzifələrində çalışmaqla keçirib.
O, ixtisasca hüquqşünas olan və qeyri-hüquq sahəsinə təyinat alan ilk nazir deyil.
İqtisadiyyat naziri Mikayıl Cabbarov, əmək və əhalinin sosial müdafiəsi naziri Anar Əliyev, maliyyə naziri Sahil Babayev, xarici işlər naziri Ceyhun Bayramov və mədəniyyət naziri Adil Kərimli də hüquq sahəsi üzrə ixtisaslaşıblar. Bunlardan M.Cabbarov və C.Bayramovun iqtisadiyyat üzrə də ali təhsili var.
Nazirlər Kabinetinin üzvü olan Dövlət Turizm Agentliyinin sədri Fuad Nağıyev də ixtisasca hüquqşünasdır.
III Respublika Platformasının qurucu üzvü, siyasi şərhçi Araz Əliyev "Toplum TV"-yə deyir ki, prezidentin hüquqa birbaşa aidiyyəti olmayan sahələrə hüquqşünasları təyin etməsinin səbəbi onun diqtə etdiyi, hüquqa zidd siyasi xəttin hüquqi müstəviyə salınmasını istəməsidir.
"Ona görə də bu şəxslərin hüquqi biliklərə malik olması "Tək Adam" rejimi üçün daha arzuolunandır. Onlar avtoritar sistemin istəklərini hüquqi çərçivəyə salıb icra etməkdən mükəlləfdir. Lakin biz inkişaf etmiş ölkələrə baxanda görürük ki, önəmli sahələrə müvafiq ixtisas üzrə bilikli şəxslər təyin olunur və onlar yeri gələndə hökumət başçısını müəyyən siyasi xətdən geri addım atmağa da məcbur edə bilirlər. Azərbaycanda isə bir nazirin hansısa qərara etiraz etməsi mümkün deyil", - o qeyd edib.
Toplum TV Azərbaycanın müstəqil xəbər platformasıdır. O, ölkədə və bölgədə baş verən siyasət, iqtisadiyyat, sosial, kriminal, gender mövzularında xəbərləri dəqiq və qərəzsiz şəkildə izləyicilərimizə çatdırır.
Şikayətlərinizi bizə göndərin: info@toplummedia.tv
Komitə: “Əli Kərimliyə qarşı insan ləyaqətini alçaldan rəftar və işgəncə tətbiq olunur”
sosial media
Bəhruz Səmədov: "Göz müayinəsi üçün hələ də həkim göndərilmir"
Sosial media
