Artıq bir aydan çoxdur həbsdə olan Siyasi Menecment İnstitutunun direktoru Azər Qsımlı ictimiayyətə müraciət edib. 

O, həbsinin siyasi sifariş əsasında həyata keçirildiyinin hər kəsə aydın olduğunu bildirir. 

“Mənə qarşı irəli sürülən ittihamnamədə bir dənə də olsun sübut yoxdur. Məhkəmədə də vəkilimin “heç olmasa bir dənə ilkin sübut göstərə bilərsinizmi?” sualına müstəntiq sükutla cavab verdi. Bu nəinki təqsirsizlik prezumpsiyasının pozulması, ümumilikdə qanunun, hüququn tapdanmasıdır. Mənimsə, kifayət qədər sübutum var.

Bu ittihamın mənim təbiətimə nə qədər zidd olduğunu məni tanıyan hər kəs bilir. Mən hətta övladlarımı belə təhdidlə yox, təşviqlə tərbiyə etmişəm”, SMİ rəhbəri qeyd edir.

Azər Qsımlı hesab edir ki, onu yalnız bir səbəbə görə həbs ediblər:

“Həqiqətləri danışdığıma görə. Mənim dediyim həqiqət budur: Azərbaycanın MİLLİ MARAQLARI hüquqi dövlətin, azad iqtisadi mühitin və demokratiyanın gətirəcəyi tərəqqiyə söykənir. Mən nə qərbyönümlüyəm, nə şimalyönümlü, nə də cənubyönümlü. Mən Azərbaycanyönümlüyəm! Lakin bununla yanaşı ölkəmizin təhlükəsizliyini riskə atmadan Qərblə dərin əməkdaşlığın, Avropa Birliyinə və müasir dünyaya inteqrasiyanın tərəfdarıyam. Və bunun da milli maraqlarımıza uyğun olduğunu düşünürəm.

Bütün bunları nəzərə alaraq həbsimi söz azadlığına qəsd kimi dəyərləndirirəm”.

Azər Qasımlı ötən il dekabrın 8-də Cinayət Məcəlləsinin 182.2.3-cü (Hədə-qorxu ilə tələb etmə, zor tətbiq etmə ilə törədildikdə) maddəsilə şübhəli şəxs qismində saxlanılıb.

O, ittihamı qəbul etmir və məhkəmədə saxlanılmasının ictimai-siyasi fəaliyyəti ilə bağlı olduğunu bildirib.

Azər Qasımlı hakimiyyətin tənqidçilərindəndir. 

Hüquq müdafiəçiləri Azərbaycanda 300-dən çox siyasi məhbus olduğunu bildirirlər. Beynəlxalq hüquq-müdafiə təşkilatları ölkə hakimiyyətini insan haqları sahəsindəki siyasətinə görə təniqd edir, son illər həbs edilən ictimai fəalları, jurnalistləri azad etməyə çağırırlar. 

Azərbaycan hakimiyyəti bu tənqidləri qəbul etmir, ölkənin daxili işlərinə müdaxilə kimi dəyərləndirir, ölkədə bütün hüquq və azadlıqların təmin edildiyini, heç kimin siyasi mövqeyinə görə təqib edilmədiyini bildirir.