1 saylı Bakı İstintaq Təcridxanasının qadın korpusunun əməkdaşı Aygül Babayevanın buna qədər Sevinc Vaqifqızına qarşı da zorakılıq etdiyi bildirilir

“Abzas Media”nın jurnalisti Nərgiz Absalamovanın 1 saylı Bakı İstintaq Təcridxanasında zorakılığa məruz qaldığı deyilir. Bu barədə o özü ailəsinə məlumat verib (“Abzas Media”).

Jurnalist bildirib ki, vəkillə görüşdən qayıdarkən Sevinc Vaqifqızının saxlanıldığı kameraya yaxınlaşaraq ona salam vermək istəyib. Bu zaman onu kameranın qarşısından uzaqlaşdırmağa çalışan nəzarətçi Aygül Babayevanın dırnaqları ilə Nərgizin qolunu bir neçə yerdən cızdığı, nəticədə qolunda yara izləri yarandığını qeyd edilir.

Nərgiz Absalamova həmin nəzarətçinin bundan əvvəl də bir neçə dəfə onlara qarşı xüsusi zorakılıq və kobudluq hallarına yol verdiyini bildirib.

Ədliyyə Nazirliyinin Penitensiar Xidməti hələlik məsələyə münasibət bildirməyib.

Aygül Babayeva adlı nəzarətçinin bir neçə həftə əvvəl “Abzas Media”nın həbsdə olan baş redaktoru Sevinc Vaqifqızına qarşı da zorakılıq etdiyi bildirlilmişdi. Vaqifqızı deyib ki, ailəsinə zəng etməyə gedərkən həmkarı Elnarə Qasımovanın saxlanıldığı kameranın nəfəsliyinə yaxınlaşıb salam vermək istəyib. Bu zaman Aygül Babayeva onun qolunu şiddətlə sıxaraq divara doğru itələyib.

“Abzas Media işi” üzrə nəşrin altı əməkdaşı – baş direktor Ülvi Həsənli, müavini Məhəmməd Kekalov, baş redaktor Sevinc Vaqifqızı, reportyorlar Nərgiz Absalamova və Elnarə Qasımova, həmçinin araşdırmaçı jurnalist Hafiz Babalı və Azadlıq Radiosunun jurnalisti, iqtisadçı Fərid Mehrazlızadə həbs edilib.  

Onlar 2023-cü ilin noyabrından həbs edilərək əvvəlcə qaçaqmalçılıqda ittiham olunsalar da, sonradan ittihamlar ağırlaşıdırlıb. 

Bu iş üzrə həbs edilənləri 8 ildən 12- ilədək həbs cəzası gözləyir.

Onlar ttihamı rədd edir, korrupsiya araşdırmalarına görə həbs edildiklərini bidlirirlər. Beynəlxalq hüquq müdafiə təşkilatları bu təqibləri siyasi motivli hesab edir və həbs olunanların azad edilməsinə çağırırlar.

Azərbaycan hakimiyyəti isə onların peşə fəaliyyətlərinə görə həbs olunmadıqlarını, ölkədə söz azadlığı da daxil bütün hüquq və azadlıqların təmin edildiyini bildirir.