“Meydan TV işi” üzrə həbsdə olan jurnalist Ülviyyə Əli (Quliyeva) süni intellektlə hazırlanan səs yazılarına görə saxlanıldığı Bakı İstintaq Təcridxanasında təhdid olunduğunu deyir. 

"Meydan TV"-nin xəbərinə görə, bu barədə jurnalist yaxınlarına məlumat verib.

O bildirib ki, sosial şəbəkələrdə ona dəstək xarakterli açılmış səhifədə süni intellekt vasitəsilə hazırlanan səs yazısının yayılmasından sonra təcridxana rəisi onu nişanlısının da həbs ediləcəyi ilə təhdid edib. 

Sözügedən səs yazılarında Ü.Əlinin səsi ilə onun təcridxanada zorakılığa məruz qalması, eləcə də məhkəmə prosesində qaldırdığı vəsatətlər nəql edilir. 

“Dünən rəislə görüşdüm, dedi, biz bilirik ki, bu, süni intellektdir, amma elə insanlar var ki, bunu başa düşmürlər. Məndən soruşdu ki, bu videoları nişanlın hazırlayır? Cavab verdim ki, mən o qədər ağılsız deyiləm ki, ölkədə olan adama səhifə idarə etdirim”, - Ü.Əli yaxınlarına bildirib. 

Ü.Əli deyib ki, rəis fevralın 26-da onunla yenidən görüşüb və bir daha paylaşımları onun nişanlısının etdiyini iddia edib. 

“Rəis bu gün gəldi, dedi ki, nişanlın düzəldir bu səsləri. "Ona de, səsləri yığışdırsın, yoxsa bir də gördün özünü tutub gətirdilər bura”, - jurnalist məlumat verib.

"Meydan TV işi" üzrə 12 nəfər ittiham olunur.

2024-cü il dekabrın 6-da “Meydan TV işi” üzrə saytın Azərbaycan nümayəndəliyinin rəhbəri Aynur Elgünəş, jurnalistlər Ramin Deko (Cəbrayılzadə), Aysel Umudova, Aytac Tapdıq, Xəyalə Ağayeva, Natiq Cavadlı və vətəndaş cəmiyyəti üzvü Ülvi Tahirov saxlanılıblar.

Sonradan “Arqument. az” saytının baş redaktoru, "Meydan TV" ilə əməkdaşlıq edən jurnalist Şəmşad Ağa, jurnalistlər Nurlan Libre (Qəhrəmanlı), Fatimə Mövlamlı, Ülviyyə Əli (Quliyeva) və fotoqraf Əhməd Muxtar da “Meydan TV işi”nə görə həbs edilib

Onlar, əsasən, qaçaqmalçılıq olmaqla bir neçə maddə ilə ittiham olunurlar. 

Saxlanılan jurnalistlərin heç biri özünü təqsirli bilmir. Onlar jurnalist fəaliyyətinə görə hökumətin siyasi sifarişi ilə həbs olunduqlarını deyirlər.