“Gəncə terrorunu törədənlər ədalət mühakiməsi qarşısında cavab verməlidirlər”.

Bunu Azərbaycan Xarici İşlər Nazirliyinin (XİN) Mətbuat xidməti idarəsinin rəisi Leyla Abdullayeva "tviter" hesabında yazıb.

Leyla Abdullayeva qeyd edib ki, bu cinayətə görə Ermənistanda indiyədək heç kim məsuliyyətə cəlb olunmayıb: “Bu gün Azərbaycanın Gəncə şəhərinə Ermənistan silahlı qüvvələrinin 10 dinc sakinin ölümü, 40 nəfərin yaralanması ilə nəticələnən vəhşicəsinə hücumunun ikinci ildönümüdür”.

https://toplum.tv/siyaset/aspa-da-azerbaycan-ve-ermenistan-arasinda-debat-kecirilib

APA-nın məlumatına görə, Beynəlxalq Münasibətlərin Təhlili Mərkəzində (BMTM) 44 günlük müharibədə Gəncəyə hücumların ikinci ildönümü ilə bağlı tədbirdəki çıxışında isə Leyla Abdullayeva bildirib ki, XİN bu istiqamətdə məlumatlandırma aparıb, dəlillər toplanaraq beynəlxalq təşkilatlara göndərilib: “Hərbi cinayətlə bağlı Avropa Məhkəməsində və Beynəlxalq Ədalət Məhkəməsində vəsatətlər qaldırılıb. Bu məsələlərə hələ də baxılır.

Azərbaycan təqsirkarların ədalət və qanun qarşısında cavab verməsi üçün bütün imkanlar istifadə edəcək. Təəssüf ki, bu günə qədər hərbi cinayətlər törətmiş şəxslərdən bir nəfər də Ermənistanda qanun qarşısında cavab verməyib. Biz hərbi cinayətlər və insanlıq əleyhinə cinayətlər törədənlərin məsuliyyətə cəlb olunması üçün beynəlxalq ictimaiyyəti Ermənistana təzyiqlər etməyə çağırırıq”.

2020-ci ilin oktyabrın 11-də gecə saat 02.00 radələrində Gəncə  şəhərinn mərkəzi Ermənistanın ballistik raket hücumuna məruz qalıb.

Çoxmənzilli yaşayış binalarının raket atəşinə tutulması nəticəsində 4-ü qadın olmaqla 9 nəfər ölüb, 35 nəfər yaralanıb. Daha sonra yaralananlardan biri də xəstəxanada vəfat edib.

Bundan başqa, 10-dan artıq çoxmənzilli binaya və 100-dən çox müxtəlif təyinatlı obyektə ziyan dəyib. 

Baş Prokurorluğun məlumatına görə, Gəncə terrorunda zərərçəkmiş mülki əhalinin zəruri sosial ehtiyaclarının təmin edilməsi və onların məişət və şəxsi əyşalarına dəymiş ziyanın aradan qaldırılması məqsədilə 4 959 000 manat kompensasiya ödənilib.