Macarıstan Parlamenti deputat maaşlarının 40 faiz azaldılmasını təsdiqləyib.

Yeni baş nazir Peter Madyar hökuməti bu addımla bir tərəfdən dövlət büdcəsinə düşən yükü azaltmağı, digər tərəfdən isə 16 illik Viktor Orban dövründən aydın şəkildə uzaqlaşdığını nümayiş etdirməyi hədəfləyir.

Qəbul edilən qərara əsasən, deputatların aylıq ümumi əsas maaşı gələn aydan etibarən təxminən 3690 avro olacaq. Bu məbləğ hələ də ölkə üzrə orta əməkhaqqından yüksək olsa da, Orban hakimiyyəti dövründəki səviyyədən xeyli aşağıdır.

Tənqidçilər uzun illər Orbanın yüksək deputat maaşlarından parlamentdəki müxalifəti yumşaltmaq vasitəsi kimi istifadə etdiyini iddia edirdilər.

Maaşların azaldılması baş nazir Peter Madyarın daha geniş islahat paketinin bir hissəsidir. İxtisasca hüquqşünas olan Madyar uzun müddət Orban hakimiyyəti dövründə dövlət qurumlarında çalışıb, həmçinin Brüsseldə diplomat kimi fəaliyyət göstərib. O, 2024-cü ildə müstəqil media platforması “Partizan”-a verdiyi müsahibədə Orban hakimiyyəti ilə yollarını ayırdığını bəyan etmiş və bu açıqlama ölkə siyasətində geniş rezonans doğurmuşdu.

Peter Madyar vəzifəyə gəldikdən sonra ilk olaraq öz maaşını iki dəfə azaltmışdı.

“Siyasətçilər özlərini imtiyazlı təbəqə kimi deyil, dövlətin xidmətçiləri kimi görməlidirlər”, – deyən baş nazir dəyişikliklərin ilk növbədə idarəetmədən başlamalı olduğunu vurğulayıb.

Hökumət bildirir ki, bu addımlar həm də Brüsselə ünvanlanan açıq mesajdır. Macarıstan korrupsiya iddiaları və hüququn aliliyi ilə bağlı mübahisələr səbəbindən dondurulmuş Avropa İttifaqı fondlarının yenidən açılması üçün etimadı bərpa etməyə çalışır.

Bununla belə, ekspertlər hesab edirlər ki, simvolik maaş azalmaları təkbaşına kifayət deyil və ölkənin dərin struktur problemlərinin həlli üçün daha genişmiqyaslı islahatlar tələb olunur.

Peter Madyarın rəhbərlik etdiyi “Tisa” partiyası aprel seçkilərində böyük qələbə qazanaraq Viktor Orbanın 16 illik hakimiyyətinə son qoymuşdu. Hökumət “yeni başlanğıc” şüarı altında həm ölkə daxilində, həm də beynəlxalq arenada etimad yaratmağa çalışır.