İyunun 18-də Bakı Ağır Cinayətlər Məhkəməsində Azərbaycan hökumətinin etnik azlıqlarla bağlı siyasətinin tənqidçisi Kamal İsayevin işi üzrə növbəti məhkəmə prosesi keçirilib.

Hakim Fərid Namazovun sədrlik etdiyi prosesdə dövlət ittihamçısı ittiham aktını oxumağa davam edib. O, K.İsayevin müxtəlif illərdə sosial şəbəkələrdə yazdığı paylaşımlara istinad edib. 

İstinad edilən paylaşımlarından birində fəal yazıb ki, Azərbaycanda "bir gün talışlar hakimiyyətə gələcək və haqsızlığa son qoyacaq". Prokuror həm də iddia edib ki, K.İsayev özünü "Talış-Muğan Respublikası"nın mədəniyyət naziri adlandırıb. 

Daha sonra K.İsayev ittihamlara cavab verib. O, heç vaxt Azərbaycanın parçalanmasının tərəfdarı olmadığını deyib. 

"Heç bir talış dövlətinin yaradılmasının da tərəfdarı  olmamışam. Özümü nazir elan etməyimlə bağlı iddia da yalandır. "WhatsApp" qrupunda mənə mədəniyyət işləri üzrə nəzarətçilik həvalə olunub. Son 7-8 ildə mənim sosial şəbəkələrdə yüzlərlə çıxışım və paylaşımım olub, hərəsindən özlərinə sərf edən bir cümlə çıxarıb ittiham aktı tərtib ediblər. Mən qəbul edirəm ki, bu çıxışlar mənə məxsusdur, amma özümü qətiyyən təqsirli bilmirəm. Tamamilə böhtanla dolu cinayət işidir", - o qeyd edib. 

Növbəti məhkəmə prosesi iyulun 29-u saat 11:00-a təyin olunub. 

Rusiya vətəndaşı olan və bu ölkədə yaşayan Kamal İsayev ötən ilin noyabrında Türkiyəyə səyahət edərkən saxlanılıb və Azərbaycana ekstradisiya edilib. 

K.İsayevin “YouTube” platformasında “Jahid Kamal” və “Arya Toloş” adlı kanalları olub və o, Azərbaycan hakimiyyətinin etnik azlıqlarla bağlı siyasətini mütəmadi tənqid edib.

K.İsayev Cinayət Məcəlləsinin 281.2-ci (dövlət əleyhinə yönələn açıq çağırışların bir qrup şəxs tərəfindən törədilməsi), 281-1.2-ci (Azərbaycan Respublikasının ərazi bütövlüyünün parçalanmasına yönələn atribut və simvolların bir qrup şəxs tərəfindən yayılması) və 283.2.1-ci (milli, irqi, sosial və ya dini nifrət və düşmənçiliyin zor tətbiqi və ya zor hədəsi ilə salınması) maddələri ilə ittiham olunur.