Keçmiş İran şahının oğlu Rza Pəhləvi İrana ABŞ və İsrailin birgə hücumlar etdiyi bir vaxtda bu ölkədə yaşayan etnik azlıqlara müraciət edib. 

Pəhləvi "X" səhifəsində paylaşdığı videomüraciətdə azərbaycanlılar, kürdlər, lurlar, yaresanlar və başqa xalqlara xitab edərək onları birliyə çağırıb.

“İslam Respublikası hakimiyyəti ələ keçirdiyi ilk gündən bu günə qədər siz bu zalım və cinayətkar rejimin qəzəbinin və təqiblərinin hədəfi olmusunuz, lakin heç vaxt təslim olmağa razılaşmadınız. Son 47 il ərzində, xüsusilə milli ‘Şir və Günəş’ inqilabı zamanı, azadlıq və ölkəmizi geri almaq yolunda onlarla şəhid vermisiniz", - o deyib. 

Keçmiş şahzadə söz verib ki, onun rəhbərliyi altında etnik azlıqlar ayrı-seçkiliyə məruz qalmayacaq. 

“Sabahkı İranda - dinin dövlətdən ayrılmasına, qanunun aliliyinə və bərabər vətəndaşlıq hüquqlarına əsaslanan bir hökumət qurulduqda sizin artıq ayrı-seçkiliklə üzləşməməyiniz üçün bütün gücümlə çalışacağam. Siz kimliyiniz qorunmaqla və azad şəkildə digər hər bir iranlı kimi yaşaya biləcəksiniz və azad bir İranın nemətlərindən ədalətli şəkildə faydalanacaqsınız", - Pəhləvi qeyd edib. 

“Biz bu rejimin süqutunun astanasındayıq. Lakin ayıq-sayıq və hazırlıqlı olmalıyıq, həmçinin həmişə İran torpağına tamahkar gözlə baxmış fürsətcil qüvvələrin mövcud vəziyyətdən sui-istifadə etməsinə imkan verməməliyik. İnanıram ki, milli iradə və birlik sayəsində sizi və bütün digər iranlıları parlaq bir gələcək gözləyir", - o əlavə edib. 

Pəhləvi daha öncə ABŞ və İsrailin İrana hücumlarını dəstəkləyib. O, İranda hakimiyyət dəyişikliyi baş verəcəyi təqdirdə yaradılacaq keçid hökumətinə başçılıq etməyə iddialıdır. 

ABŞ prezidenti Donald Tramp isə bir neçə dəfə jurnalistlərə açıqlamasında Pəhləvinin İranı idarə edə biləcəyinə şübhəli ilə yanaşdığını deyib. 

Fevralın 28-də ABŞ və İsrail ordusu İrana havadan zərbələr endirməyə başlayıb. İran da qarşılığında Yaxın Şərqdəki ABŞ bazalarına, İsrailə, habelə digər Yaxın Şərq ölkələrinə raket zərbələri endirir. 

İranın Qırmızı Aypara Cəmiyyətinin martın 4-ə olan məlumatına görə, İranda ölənlərin sayı 1000-i keçib.