“İndiyədək Robert Koçaryan məsələsi ilə bağlı Rusiyadan heç kim zəng etməyib və ümid edirəm ki, heç kim zəng etməyəcək, çünki bunun mənası yoxdur”.
Bu barədə Ermənistan Təhlükəsizlik Şurasının katibi Alen Simonyan “Dojd” telekanalının efirində bildirib.

O qeyd edib ki, Koçaryan və onun siyasi qüvvəsinin səsləndirdiyi ritorika əsasən Moskvadan “danışan başlar” vasitəsilə səsləndirilən ritorika ilə üst-üstə düşür.

Simonyan Robert Koçaryan və ailə üzvləri ilə bağlı aparılan axtarış və həbsləri parlamentdə “Ermənistan” alyansının deputatı, Robert Koçaryanın oğlu Levon Koçaryanla baş nazir Nikol Paşinyan arasında baş verən sözlü mübahisə ilə əlaqələndirmək cəhdlərini gülünc adlandırıb.

“Bu, mümkün deyil. Robert Koçaryan və ailəsi ilə bağlı saxlanılmaların aparıldığı cinayət işləri çoxdan başlanıb”, - Simonyan vurğulayıb.

Kremlin sözçüsü Dmitri Peskov isə Robert Koçaryanın saxlanılması da daxil olmaqla Ermənistanda baş verən daxili siyasi prosesləri şərh etmək istəmədiyini bildirib. O, proseslərin qanuna uyğun aparılacağına və siyasi proses iştirakçılarının hüquqlarına hörmət ediləcəyinə ümid etdiyini deyib.

Avqustun 24-də parlamentdə “Ermənistan” alyansının deputatı, Robert Koçaryanın oğlu Levon Koçaryanla baş nazir Nikol Paşinyan arasında mübahisə baş verib.

Paşinyan Levon Koçaryanın sualını cavablandırarkən Robert Koçaryanı məhkəməyə verəcəyini bəyan edib:
“Ailəniz niyə milyonçudur? Bu sərvəti haradan əldə etmisiniz? Demək istəyirsiniz ki, milyonlarınız övladlarınıza miras qalacaq... Mən sizə birbaşa deyirəm ki, bu baş verməyəcək. Bu, şəxsi deyil, siyasi məsələdir. Bu sərvətin hər bir qəpiyi Ermənistana qaytarılmalıdır”.
L.Koçaryan isə cavabında bildirib ki, nəyin kimə qaytarılacağına ölkənin birinci şəxsi deyil, yalnız məhkəmə qərar verə bilər.

Ermənistanın keçmiş prezidenti, “Ermənistan” alyansının lideri Robert Koçaryan avqustun 25-də korrupsiya cinayət işi çərçivəsində saxlanılıb. Bundan əvvəl onun və oğlu, deputat Levon Koçaryanın evində axtarış aparılıb.

Ermənistanın Korrupsiyaya Qarşı Mübarizə Komitəsinin məlumatına görə, iş üzrə Robert Koçaryan və digər oğlu Sedrak Koçaryan da daxil olmaqla 6 nəfər saxlanılıb.

İstintaq keçmiş prezidenti vəzifə səlahiyyətlərindən istifadə edərək dövlət əmlakını mənimsəməkdə və bir sıra dəyərli obyektləri bazar qiymətindən dəfələrlə ucuz əldə etməkdə ittiham edir.

Robert Koçaryan 1998-2008-ci illərdə Ermənistan prezidenti olub.