ABŞ prezidenti Donald Tramp ölkəsinin Suriyaya tətbiq etdiyi sanksiyaları götürəcəyini deyib. 

Tramp bunu mayın 13-də Səudiyyə Ərəbistanında çıxışı zamanı deyib.

O, qərarı Səudiyyə Ərəbistanının vəliəhdi Məhəmməd bin Salman və Türkiyə Prezidenti Rəcəb Tayyib Ərdoğanla müzakirə etdikdən sonra verdiyini bildirib. 

“Suriya illərlə fəlakət, müharibə və qətliamlarla üzləşib. Buna görə də mənim administrasiyam on ildən artıq fasilədən sonra ABŞ ilə Suriya arasında normal münasibətlərin bərpası istiqamətində ilk addımları atıb”, - Tramp deyib. 

O xəbər verib ki, ABŞ Dövlət katibi Marko Rubio bu həftə Türkiyədə suriyalı həmkarı ilə görüşəcək. 

2011-ci ildə başlayan vətəndaş müharibəsi fonunda Suriyanı idarə edən Bəşər Əsəd rejimi ötən ilin dekabr ayında, ABŞ-da Co Bayden prezident ikən devrilib. 

Suriyanın yeni hökuməti ümid edir ki, yanvardan ABŞ-a rəhbərlik edən Tramp ölkəyə tətbiq olunan ağır sanksiyaları ləğv edəcək.

“Sanksiyalar qəddar və iflicedici idi, lakin o dövrdə olduqca vacib bir funksiyanı yerinə yetirirdi. Amma indi onların parlamasının vaxtıdır. Mən deyirəm: ‘Uğurlar, Suriya.’ Bizə nəsə çox xüsusi bir şey göstərin”, - Tramp çıxışında deyib. 

“Sanksiyaların ləğvini bərpa yolunda yeni bir başlanğıc kimi görürük. Ərəb qardaşlarımızın — başda Səudiyyə Ərəbistanı olmaqla — tutduğu mövqelərə görə təşəkkür edirik. Biz Suriya xalqına və onun tarixinə layiq bir gələcəyə doğru yeni bir fəsil açırıq”, - Suriyanın xarici işlər naziri Əsəd Əl-Şaybani “X” səhifəsində yazıb. 

Trampın anonsunu eşidən suriyalılar Dəməşq, Homs və başqa şəhərlərdə küçələrə çıxaraq bayram ediblər. 

Suriyanın iqtisadiyyat naziri Məhəmməd Əl-Şar “Əl-Ərəbiyə”nin canlı yayımında göz yaşlarını saxlaya bilməyib. 

“Bununla, vəsaitlərin axını başlayacaq — əvvəlcə xaricdə yaşayan suriyalılardan, daha sonra isə dəstək verən ölkələrdən. İqtisadiyyatın təkərləri fırlanmağa başlayacaq, ticarət və investisiya vədləri gerçəkləşəcək, çünki indi mənzərə investisiyalar üçün açıqdır”, - nazir bildirib. 

ABŞ ilk dəfə 1979-cu ildə Suriyanı “terrorizmin sponsoru olan dövlət” kimi tanıyıb və bu, silah embarqosu və xarici yardımı da əhatə edən maliyyə məhdudiyyətlərinə səbəb olub. 

2011-ci ildə Suriyada müharibə başlayandan və Əsəd rejimi hökumət əleyhinə çıxan dinc etirazçılara qarşı hücumlara başladıqdan sonra, Suriyaya və rejimlə əlaqəli şəxslərə qarşı çoxsaylı genişmiqyaslı sanksiyalar tətbiq olundu. Bunlara xaricdə saxlanılan Suriya hökumətinə məxsus aktivlərin dondurulması, ABŞ-ın Suriyaya investisiyalarına qadağa və neft məhsullarının idxalına qoyulan məhdudiyyətlər daxil idi.