İyulun 4-də Milli Məclisdə “Media haqqında” qanuna dəyişikliklər müzakirəyə çıxarılıb. 

Dəyişikliklər birinci oxunuşda qəbul edilib. 

Bəzi dəyişikliklər Azərbaycanda fəaliyyət göstərmək istəyən xarici media qurumlarına şamil olunub. 

Bunlardan birinə əsasən, Azərbaycanda xarici media subyektlərinin filial və nümayəndəlikləri dövlət qeydiyyatına alındıqdan sonra 3 iş günü ərzində müvafiq icra hakimiyyəti orqanının müəyyən etdiyi orqana məlumat verməlidir.

Əlavə olaraq, onlar dövlət qeydiyyatına alındıqdan sonra 7 iş günü ərzində dövlət media reyestrinə daxil edilmək üçün eyni orqana müraciət etməlidirlər.

Xarici media subyektlərinin bu tələbləri pozduqda, habelə media reyestrindən çıxarıldıqda isə onların filial və nümayəndəliyi ləğv oluna, saytına isə giriş məhdudlaşdırıla bilər. 

Başqa bir dəyişikliyə əsasən, informasiya agentliyinin azı 20 media subyekti ilə informasiya verilməsi haqqında müqaviləsi olmalı və azı 5 xarici ölkədə jurnalisti akkreditasiya olunmalıdır. 

Bundan əlavə, çap mediası subyekti media reyestrində olmadan fəaliyyət göstərdikdə onun çap məhsulunun nəşri və ya yayımı qadağan edilir.

İndiyədək qüvvədə olan qanunda isə qeyd olunurdu ki, çap mediası məhsulunun yayımının dayandırılmasına və onun tirajının müsadirə edilməsinə yalnız məhkəmə qərar verir. 

Digər dəyişiklikdə vurğulanır ki, media subyektlərinin adları digərlərinin adları ilə eyni və ya oxşar olmamalı, onların adlarında “ictimai qaydaya, mənəviyyata və əxlaqa zidd olan, istifadəçiləri yanılda bilən ifadələrdən” istifadə edilməməlidir.

2021-ci ilin dekabrın 30-da Azərbaycan parlamenti media haqqında qanun qəbul edib. Azərbaycan Prezidenti İlham Əliyev qanunu 2022-ci ilin fevralında imzalayıb.

Qanun media sahəsində təşkilati-hüquqi və iqtisadi əsasları, habelə kütləvi informasiyanın əldə edilməsi, hazırlanması, ötürülməsi, istehsalı və yayılmasının ümumi qaydalarını müəyyən edir.
Sənəd jurnalistlərin fəaliyyəti ilə bağlı məsələləri, o cümlədən jurnalistlərə müvafiq vahid vəsiqələrin verilməsi, media reyestri yaradılması məsələlərini əhatə edir və gizli çəkiliş aparılmasını qadağan edir. 

Qanunun qəbulu ərəfəsində bir çox jurnalist etiraz aksiyası keçirərək ona qarşı çıxmışdılar.