Qarabağ ermənilərinin nümayəndələri vaxtilə Dağlıq Qarabağ münaqişəsinin həlli üçün yaradılmış Minsk Qrupunun buraxılmaması üçün müraciət edib. 

Avropada Təhlükəsizlik və Əməkdaşlıq üçün Təşkilatın (ATƏT) üzv dövlətlərinə edilən müraciətdə onlar Minsk Qrupunun buraxılmasının “qarşısını almaq üçün zəruri olduqda veto hüququndan istifadə də daxil olmaqla, öz səlahiyyətlərini həyata keçirməyə” çağırıblar.

Avqustun 20-də sosial mediada dərc olunan müraciət 2023-cü ilin sentyabrına qədər Qarabağda fəaliyyət göstərmiş separatçı rejimin parlamentinin başçısı Aşot Danielyan tərəfindən, bütün parlament üzvləri adından imzalanıb. 

Müraciətdə qeyd olunub ki, imzaçılar “özlərinin ata-baba yurdlarından zorla didərgin salınmış 150 min Qarabağ ermənisi adından üzv dövlətlərə dərin təciliyyət və ciddi narahatlıqla” müraciət edirlər. 

Onlar ATƏT-in üzv dövlətlərini “Qarabağdan didərgin salınmış erməni əhalisinin təhlükəsiz və ləyaqətli şəkildə geri dönüşünü təmin edəcək möhkəm təminatlar mövcud olmayana qədər” Minsk Qrupunun buraxılmasının qarşısını almaq üçün səlahiyyətlərindən istifadə etməyə çağırıblar. 

“Bütöv bir əhali tamamilə didərgin salınmış, hüquqlarından məhrum edilmiş halda münaqişəni həll olunmuş saymaq olmaz”, - müraciətdə qeyd olunub. 

“Azərbaycanın Qarabağda həyata keçirdiyi etnik təmizləməni legitimləşdirmək və münaqişəni həll olunmuş hesab etmək ATƏT-in tarixində, nüfuzunda və prinsiplərində silinməz, qanlı bir ləkə buraxacaq”, - deyə əlavə olunub. 

Bu yaxınlarda Ermənistanın baş naziri Nikol Paşinyan çıxışında Qarabağ ermənilərinin qayıdışı məsələsinin müzakirəsini “təhlükəli amil” adlandıraraq, bunun 8 avqust Vaşinqton razılaşmalarından sonra “bərqərar olmuş sülhə zərər vurduğunu” bildirib.

Avqustun 8-də Ağ Evdə Azərbaycan və Ermənistan xarici işlər nazirləri iki ölkənin adından Minsk Qrupunun buraxılması üçün ATƏT-ə müraciət imzalayıb. 

1992-ci ildə Birinci Qarabağ Müharibəsi zamanı yaradılan Minsk Qrupuna Fransa, Rusiya və ABŞ həmsədrlik edib. 

Minsk Qrupu 2020-ci ildə baş tutan İkinci Qarabağ müharibəsinədək Ermənistan və Azərbaycan arasında aparılan danışıqlar üçün əsas platforma olub. 

Azərbaycan prezidenti İlham Əliyev dəfələrlə çıxışlarında Minsk Qrupunu tənqid edib, qurumun “fəaliyyətsizliyinin” müharibənin başlaması üçün əsas səbəblərdən biri olduğunu deyib. 

Minsk Qrupunun ləğvi Azərbaycanın Ermənistanla sülh müqaviləsinin imzalanması üçün irəli sürdüyü əsas şərtlərdən biri olub. Martın ortalarında mətni razılaşdırılan həmin müqavilə avqustun 8-də Vaşinqtonda paraflansa da, hələ imzalanmayıb.