Həbsdə olan müstəqil jurnalist Ülviyyə Əli (Quliyeva) ictimaiyyət üçün növbəti məktubunu göndərib. 

Yaxınlarının dərc etdiyi məktubda jurnalist ötən ay həbs olunan “Sputnik Azərbaycan” jurnalistlərinin həbsinə toxunub. 

“Onların həbsi ilə bağlı gülüşlə qarşıladığım yanaşmalardan biri, hökumətyönlü media orqanlarının müstəqil jurnalistlərlə “Sputnik” əməkdaşlarının həbslərini eyniləşdirməyə çalışmasıdır. Guya Kenan Evren kimi “birini sağdan asdıq, birini soldan asdıq” mesajını verirlər. Aydın məsələdir ki, onların da həbsi siyasi sifariş idi, lakin fərqimiz böyükdür. “Sputnik” jurnalistləri sifarişli jurnalistlərdir və ipləri öz əllərində olmayıb, biz isə heç kimin tapşırığını yerinə yetirmədiyimiz, müstəqil fəaliyyət göstərdiyimiz üçün həbs olunmuşuq. Ona görə də onlarla bizim həbsimizi eyniləşdirmək absurddur”, - Ü.Əli qeyd edib. 

Jurnalist hökumətyönlü medianın reportajlarında Rusiyadakı jurnalist həbslərindən danışarkən beynəlxalq hüquq müdafiəsi təşkilatlarının hesabatlarına istinad olunmasını da gülünc hesab edib. Onun sözlərinə görə, eyni hesabatlarda Azərbaycanda da insan hüquqları ilə bağlı vəziyyətin kritik olduğu öz əksini tapır, lakin “gözardı edilir və hesabatlar qərəzli adlandırılır”.

“Reportajlarda hökumət “Sputnik” jurnalistlərini Federal Təhlükəsizlik Xidmətinin agentləri kimi təqdim edir. Azərbaycanda müstəqil jurnalistlərə qarşı repressiya dalğası başlayan zaman elə “Sputnik”də də bizim həbsimizin labüd olması ilə bağlı tezis yazılaraq fətva verilmişdi. Əslində bu bir etiraf sayılmalıdır, çünki bizim həbsdə olmağımız onu sübut edir ki, Azərbaycan dövləti Federal Təhlükəsizlik Xidmətinin tapşırığını icra edib”, - o əlavə edib. 

Mayın 7-də “Meydan TV işi” üzrə həbs olunan Ülviyyə Əli jurnalist kimi “Amerikanın Səsi” ilə əməkdaşlıq edib. 

Bu media qurumu ilə əməkdaşlığını bitirəndən sonra da öz sosial media hesablarında siyasi motivli məhkəmələrdən reportajlar yayımlamağa davam edib. 

2024-cü il dekabrın 6-da “Meydan TV işi” üzrə saytın Azərbaycan nümayəndəliyinin rəhbəri Aynur Elgünəş, jurnalistlər Ramin Deko, Aysel Umudova, Aytac Tapdıq, Xəyalə Ağayeva, Natiq Cavadlı saxlanılıblar.

Sonradan “arqument.az” saytının baş redaktoru, Meydan TV ilə əməkdaşlıq edən jurnalist Şəmşad Ağayev (Ağa), jurnalistlər Nurlan Libre (Qəhrəmanlı) və Fatimə Mövlamlı da “Meydan TV işi”nə görə həbs edilib.

Saxlanılan jurnalistlərin heç biri özünü təqsirli bilmir.