Türkiyədə saxlanılaraq Azərbaycana gətirilən talış fəal Kamal İsayevin Azərbaycan Cinayət Məcəlləsi üzrə ittiham olunduğu maddələr məlum olub. 

Fəalın həyat yoldaşı Aida İsayeva "Toplum TV"-yə deyib ki, K.İsayev Cinayət Məcəlləsinin 281.2-ci (dövlət əleyhinə yönələn açıq çağırışlar) və 283.1-ci (milli, irqi, sosial və ya dini düşmənçiliyin salınması) maddələri ilə ittiham olunur. 

Bu maddələrdən birincisi üzrə 5-8 il, digəri üzrə 2-4 il həbs cəzası nəzərdə tutulur. 

A.İsayeva bu barədə həyat yoldaşına dövlət tərəfindən ayrılan vəkil vasitəsilə öyrənib. 

Moskvada yaşayan A.İsayeva bildirir ki, indiyə qədər nə özü, nə də Bakıda yaşayan qohumları K.İsayevlə əlaqə saxlaya bilir. 

O xatırladıb ki, sonuncu dəfə noyabrın 7-də həyat yoldaşı ilə telefon əlaqəsi olub və onun həbsindən yalnız noyabrın 12-də xəbər tutub. 

A.İsayeva Rusiya vətəndaşı olan həyat yoldaşı ilə bağlı bu ölkənin Xarici İşlər Nazirliyinə (XİN) müraciət edib. XİN-dən ona müraciətinin qeydə alındığı və qiymətləndirmə üçün Bakıdakı Rusiya səfirliyinə göndərildiyi bildirilib. 

Vəkil, həmçinin, ailəyə bildirib ki, K.İsayevin məhkəməsi hələ də olmayıb. 

A.İsayeva daha öncə "Toplum TV"-yə deyib ki, həyat yoldaşı Sovet İttifaqı dağılmamışdan əvvəl Moskvaya köçüb və sonradan Rusiya vətəndaşlığı alıb. O, “Facebook” hesabında Rusiya prezidenti Vladimir Putinə müraciət edərək həyat yoldaşının azad olunmasına yardım göstərilməsini xahiş edib.

Onun sözlərinə görə, xroniki peptik yara xəstəliyindən əziyyət çəkən K.İsayev noyabrın 2-də müalicə məqsədilə İstanbula səfər edib. 

Vəkil Cahangir Cavadov "OC Media"ya açıqlamasında iddia edib ki, K.İsayevin ikili vətəndaşlığı var və beynəlxalq qanunvericilik onun Azərbaycana deportasiyasını qadağan etmir.

A.İsayeva isə həyat yoldaşının heç vaxt Azərbaycan vətəndaşlığı olmadığını bildirir.

K.İsayevin “YouTube” platformasında “Jahid Kamal” və “Arya Toloş” adlı kanalları olub və o, Azərbaycan hakimiyyətinin etnik azlıqlarla bağlı siyasətini mütəmadi tənqid edib.

“O, talışların hüquqlarından, talış dilinin ölməsindən danışırdı. Həmçinin siyasi məhbusları müdafiə edirdi. Heç vaxt dövlət çevrilişindən danışmayıb”, - A.İsayeva deyib.

Mart ayında talış tarixçi Zahirəddin İbrahimovun Rusiyanın Yekaterinburq şəhərində yoxa çıxdığı xəbəri yayılmışdı. Bir müddət sonra onun Lənkəranda yaşayan qohumları Dövlət Təhlükəsizliyi Xidmətindən məktub alıblar. Məktubda Z.İbrahimova qarşı dövlətə xəyanət də daxil olmaqla bir neçə ittiham qeyd olunub.

Bundan əvvəl isə Belarusda yaşayan talış mədəniyyəti tədqiqatçısı İqbal Əbilov Azərbaycana səfəri zamanı - 2024-cü il iyulun 22-də saxlanılmışdı. Ona Lənkəran Ağır Cinayətlər Məhkəməsi tərəfindən 18 il həbs cəzası verilib.

İttihama görə, İ.Əbilov Ermənistan xüsusi xidmət orqanları ilə əməkdaşlıqda və milli zəmində nifrət yaratmaq cəhdində günahlandırılır. O, Cinayət Məcəlləsinin 274-cü (dövlətə xəyanət), 281.3-cü (xarici təşkilatların tapşırığı ilə dövlət əleyhinə çağırışlar) və 283.1-ci (nifrət və düşmənçilik salma) maddələri ilə ittiham olunur.

İ.Əbilovun Hüquqlarını Müdafiə Komitəsi isə bildirir ki, o, heç bir siyasi fəaliyyətlə məşğul olmayıb və “yeganə cinayəti” elmi obyektivlik və mədəni irsin qorunması olub.

BMT məruzəçiləri də daxil olmaqla bir neçə beynəlxalq insan haqları təşkilatı İqbal Əbilovu “siyasi məhbus” kimi tanıyıb.