Mayın 25-də Bakı Apellyasiya Məhkəməsində həbsdə olan müxalif siyasətçi Azər Qasımlının işi üzrə sonuncu məhkəmə prosesi keçirilib. 

Hakim Zəfər Əhmədovun sədrliyi ilə baş tutan prosesdə əvvəlcə A.Qasımlı çıxış edib. 

Siyasətçinin tribunadan çıxışına icazə verilsə də, əllərindəki qandal açılmayıb. O isə buna etiraz olaraq şüşə qəfəsə qaytarılmasını istəyib. 

"Bu işdə hüquq yox, iki şey rol oynayır: cəsarət və vicdan. Bakı Ağır Cinayətlər Məhkəməsində işimə baxan hakimlər yaxşı bilirdilər ki, bu işdə nə bir sübut var, nə də şahid. Həmçinin, həqiqətən təqsirli olsaydım belə, hakimlər ittihamı həbs cəzası nəzərdə tutmayan başqa maddələrə tövsif edə bilərdilər. Amma bunların heç birini etmədilər. Bu məhkəmənin qərarı isə bu hakimlərin cəsarət və vicdanının hara qədər olduğunu göstərəcək", - o qeyd edib. 

Daha sonra çıxış edən vəkil Rövşanə Rəhimli məhkəmədən müvəkkilinə bəraət verilməsini xahiş edib. 

Vəkil Aqil Layıc isə çıxışında bildirib ki, "olmayan dəlillərdən danışa bilməz". 

"Əminəm ki, verdikləri hökmlərə görə əvvəlki instansiya məhkəmələrinin hakimlərinin hissləri onları sorğulayır. İndi bu məhkəmə elə qərar çıxarsın ki, sonradan hissləri onları sorğulamasın”, - o deyib. 

Ardınca dövlət ittihamçısı çıxış edib, A.Qasımlı barəsindəki ittihamın Bakı Ağır Cinayətlər Məhkəməsində sübuta yetirildiyini bildirib. Prokuror çıxışında onu da deyib ki, A.Qasımlını hədə-qorxuda ittiham edən Qurbanəli Yusifovun şikayətinə əvvəlcə Mingəçevir Şəhər Polisi baxıb, lakin şahid və sübut olmadığı üçün cinayət işi açılmayıb.

“Bunu tarix üçün deyirəm, prokuror özü də Mingəçevir polisinə istinad edir və deyir ki, sübut və şahid olmadığına görə Mingəçevir polisi bu işi bağlayıb. Bunu sadəcə prokurorun diqqətinə çatdırıram”, - deyə A.Qasımlı prokurorun çıxışına replika verib. 

Müşavirəyə gedən hakimlər A.Qasımlı barədə hökmün qüvvədə saxlanıldığını elan ediblər. 

A.Qasımlı martın 11-də Bakı Ağır Cinayətlər Məhkəməsinin hökmü ilə 12 il müddətinə azadlıqdan məhrum edilib. O, Cinayət Məcəlləsinin 182.3.2-ci maddəsi (hədə-qorxu ilə tələb etmə, külli miqdarda əmlak əldə etmək məqsədilə törədildikdə) ilə təqsirli bilinib.

Azər Qasımlı ittihamı rədd edir və həbsinin siyasi sifariş olduğunu bildirir.