İyunun 1-də Bakı Ağır Cinayətlər Məhkəməsində Azərbaycan Xalq Cəbhəsi Partiyasının (AXCP) həbsdə olan üzvü Kənan Zeynalovun (Basqal) işi üzrə növbəti məhkəmə prosesi keçirilib. 

"Azadlıq Radiosu"nun xəbərinə görə, hakim Mahirə Kərimovanın sədrliyi ilə keçirilən prosesdə müdafiə tərəfi vəsatətlər qaldırıb. 

Anar Rəhimov adlı şəxsə bıçaqla xəsarət yetirməkdə təqsirləndirilən fəalın vəkili Nazim Musayev zərərçəkən kimi tanınan şəxsin məhkəmə iclaslarında iştirak etməməsinə etiraz edib. 

"Səbəbi aydınlaşdırılsın ki, niyə məhkəməyə gəlmir? Niyə bu işin araşdırılmasında maraqlı deyil? Bizim ona suallarımız var", - o deyib. 

K.Zeynalov əvvəlki iclaslarda bildirib ki, o, heç kimi bıçaqlamayıb. Onun sözlərinə görə, piyada getdiyi vaxt adı çəkilən şəxs ona yaxınlaşıb, qışqıraraq yerə yıxılıb və dərhal polislər hadisə yerinə gəlib. 

"Hadisələrin bu cür gedişatı bizdə ciddi şübhələr yaradır. Necə oldu ki, bu hadisə baş verəndən dərhal sonra polislər gəldi? Bu hadisənin əvvəldən hazırlanmış plan olduğunu düşünürük", - deyən vəkil A.Rəhimovun həmin gün telefonla əlaqə saxladığı şəxslərin müəyyən olunmasını istəyib. 

N.Musayev əlavə edib ki, ekspertiza A.Rəhimovun bir xəsarət aldığı haqda rəy verib, lakin onun özü istintaqa ifadəsində iki-üç bıçaq zərbəsi aldığını iddia edib. O, məhkəmədən bu ziddiyyətin də araşdırılmasını istəyib. 

Məhkəmə vəsatətlərin heç birini təmin etməyib. Növbəti proses iyunun 25-ə təyin olunub. 

AXCP sədri Əli Kərimlinin ictimai əsaslarla mühafizəçisi olmuş Kənan Zeynalov ötən il martın 22-də saxlanılıb. O, Cinayət Məcəlləsinin 126.2.4-cü (xuliqanlıq niyyəti ilə qəsdən sağlamlığa ağır zərər vurma) maddəsi ilə təqsirləndirilir.

Əli Kərimlinin ictimai əsaslarla fəaliyyət göstərmiş digər mühafizəçisi Niyaməddin Əhmədov da uzunmüddətli həbsdədir. Ona 2021-ci ildə terrorizm ittihamı ilə 13 il həbs cəzası verilib.

AXCP sədri də daxil olmaqla partiyanın 20-yə yaxın üzvü hazırda uzunmüddətli həbsdədir. Onlar ittihamları qəbul etmir və siyasi fəaliyyətlərinə görə həbs olunduqlarını bildirirlər.