İyulun 7-də Yasamal Rayon Məhkəməsində həbsdə olan tədqiqatçı İqbal Əbilovun ATV, "Trend", "Hit.az" və "Qafqazinfo" media qurumlarına qarşı qaldırdığı mülki iddia üzrə proses keçirilib.

İ.Əbilovun Hüquqlarını Müdafiə Komitəsindən "Toplum TV"-yə verilən məlumata görə, məhkəmə iclasında sözügedən media qurumlarının nümayəndələri iştirak etməyib.

İ.Əbilovun vəkili Rövşanə Rəhimli müvəkkilinin onun yanında əyləşməsinə şərait yaradılması üçün vəsatət versə də, məhkəmə bu vəsatəti təmin etməyib. 

Daha sonra İ.Əbilov talış dilində çıxış etmək istədiyini bildirib və bu məqsədlə prosesə tərcüməçi cəlb olunması barədə vəsatət verib. 

Hakim əvvəlcə vəsatəti təmin etmək istəməyib. Bu zaman R.Rəhimli müvəkkilinin ittiham olunduğu iş üzrə Lənkəran və Şirvan məhkəmələrində dövlət hesabına tərcüməçi ilə təmin olunduğunu xatırladıb. 

Hakim müvafiq tərcüməçi ilə təmin edə bilmədiyini bildirdikdən sonra müdafiə tərəfi pedaqoq Oqtay Əsgərovun tərcüməçi qismində təyin olunmasını xahiş edib. Prosesdə iştirak edən O.Əsgərov pedaqoji fəaliyyəti haqqında sənədləri təqdim etdikdən sonra məhkəmə onun növbəti prosesdə tərcüməçi kimi iştirakını təsdiqləyib.

Növbəti proses 11 avqust saat 10:30-a təyin edilib.

İ.Əbilov həbsindən sonra ATV, "Trend", "Hit.az" və "Qafqazinfo"da barəsində yayımlanan materiallarda təqsirsizlik prezumpsiyasının pozulduğunu bildirir. Bu materiallarda onun Ermənistan xüsusi xidmət orqanları ilə əməkdaşlıq etdiyi iddia olunub. 

İ.Əbilov məhkəmədən həmin materialların hüquq pozuntusu kimi tanınmasını, cavab hüququnun təmin edilməsini, media qurumlarının üzr istəməsini və ümumilikdə 6000 manat məbləğində mənəvi zərərin ödənilməsini tələb edir.

İqbal Əbilova ötən il mayın 20-də Lənkəran Ağır Cinayətlər Məhkəməsində 18 il həbs cəzası verilib.

Belarusda yaşayan tədqiqatçı 2024-cü il iyulun 22-də Azərbaycana qohumlarının yanına səfəri zamanı saxlanılıb.

O, Cinayət Məcəlləsinin 274-cü (dövlətə xəyanət), 281.3-cü (dövlət əleyhinə yönələn açıq çağırışlar – xarici təşkilatların tapşırığı ilə törədildikdə) və 283.1-ci (milli, irqi, sosial və ya dini nifrət və düşmənçiliyin salınması) maddələri ilə ittiham olunub. 

İ.Əbilovun Hüquqlarını Müdafiə Komitəsi bəyan edib ki, o, heç bir siyasi fəaliyyətdə iştirak etməyib və onun “yeganə cinayəti” elmi obyektivlik, vicdanlı araşdırma və mədəni irsi qorumaq olub.

Müxtəlif beynəlxalq insan haqları təşkilatları, o cümlədən Birləşmiş Millətlər Təşkilatının məruzəçiləri İqbal Əbilovu “siyasi məhbus” kimi tanıyıblar.