Bir qrup paytaxt sakini yağış yağanda evləri və həyətlərini su basdığına görə İri Şəhərlərin Birləşmiş Su Təchizatı Xidmətini məhkəməyə verib. 

"Azadlıq Radiosu"nun yazdığına görə, Binəqədi rayonu, 1-ci Mədən, 30-cu Korpus küçəsində yaşayan sakinlər sözügedən qurumdan əraziyə kanalizasiya xətti çəkilməsini tələb edib.

Onlar ərizələrində bildirib ki, ərazidəki kanalizasiya xəttini illər öncə özləri kustar üsulla düzəldiblər və xətt artıq tamamilə yararsız vəziyyətdədir. 

"İki gündən bir kanalizasiya xətləri tutulur, çirkab suları küçəyə axır. Xüsusən yağış yağanda xətlərin tutulması ciddi problemlər yaradır. Boruların ölçüsü kiçik olduğuna görə yağış suları kanalizasiya suları ilə birgə evlərə, həyətlərə dolur", - ərizədə qeyd olunub. 

Bakı İnzibati Məhkəməsi sakinlərin iddiasını təmin etməsə də, onlar qərardan apellyasiya şikayəti veriblər. 

Bakı Apellyasiya Məhkəməsi isə bir neçə gün əvvəl sakinlərin xeyrinə qərar verib. Məhkəmə İri Şəhərlərin Birləşmiş Su Təchizatı Xidmətinin üzərinə sözügedən ərazidə ümumi kanalizasiya xəttinin layihələndirilməsi və inşası öhdəliyini qoyub.

Dövlət qurumu məhkəməyə göndərdiyi məktubda bildirib ki, paytaxtda kanalizasiya sistemlərinin yenidən qurulması və genişləndirilməsi işləri mərhələli qaydada həyata keçirilir. 

"Yalnız Böyükşor hövzəsi üzrə magistral infrastrukturun yaradılmasından sonra Binəqədi qəsəbəsində, o cümlədən müraciətdə qeyd olunan 1-ci Mədən ərazisində toplayıcı kanalizasiya şəbəkələrinin genişləndirilməsi məsələsinə baxılması nəzərdə tutulur", - cavabdeh tərəf qeyd edib. 

Məhkəmə isə bu arqumentlə razılaşmayıb. Qərarda vurğulanıb ki, yenidənqurmanın mərhələli şəkildə aparılmasını təsdiqləyən hər hansı növbəlilik siyahısı və ya plan təqdim olunmayıb. 

Məhkəməyə təqdim olunan mütəxəssis rəyində də göstərilir ki, ərazidəki evlər mərkəzləşdirilmiş kanalizasiya kollektorundan çox uzaqda yerləşmir və onları kanalizasiya sisteminə qoşmaq çətin deyil. 

Azərbaycan prezidenti İlham Əliyev bu ilin əvvəlində keçirdiyi müşavirədə Bakıda kanalizasiya xidməti göstərilən əhalinin cəmi 50 faiz təşkil etdiyini, lakin yeni proqramın icrası ilə bu göstəricinin 95 faizə çatdırılacağını bildirib. 

Bakı şəhərinin 2040-cı ilədək inkişafına dair baş planında göstərilir ki, 2020-2040-cı illərdə paytaxtın su və kanalizasiya sistemlərinin qurulmasına 9,2 milyard manat vəsait tələb olunur. Bunun 487,9 milyon manatı sırf yağış kanalizasiya xətlərinin çəkilməsi üçün lazımdır.