Martın 11-də Bakı Ağır Cinayətlər Məhkəməsində “QHT işi” üzrə ittiham olunan vətəndaş cəmiyyəti fəalı Nərgiz Muxtarovanın növbəti məhkəmə prosesi keçirilib. 

Hakim Leyla Əsgərova-Məmmədovanın sədrlik etdiyi prosesdə təqsirləndirilən şəxsin özü ifadə verib. O, irəli sürülən ittihamlara dair heç bir sübut olmadığını qeyd edib. 

N.Muxtarova bildirib ki, ittiham aktında iddia olunan kimi qrant almayıb, sadəcə xidməti müqavilə əsasında işlər görüb və bu işlər üçün maliyyə ABŞ Dövlət Departamentindən ayrılıb.

“İttihamlardan biri cinayət yoluyla əldə edilən vəsaitlərin leqallaşdırılmasıdır. Mənbəyi bəlli olan pul cinayət yolu ilə necə əldə oluna bilər?”, - o sual edib. 

O, "bir qrup şəxslə əlbir olub cinayət törətməsi" barədə ittihama da münasibət bildirib və deyib ki, ittiham aktında həmin şəxslərin kimliyinə aydınlıq gətirilməyib. 

Növbəti məhkəmə prosesi aprelin 8-ə təyin olunub. 

"QHT işi” üzrə həbslər 2025-ci ilin martında başlayıb. Vətəndaş Hüquqları İnstitutunun rəhbəri Bəşir Süleymanlı, "Seçki Müşahidə" Alyansının icraçı direktoru Məmməd Alpay və "Hüquq və İnkişaf" İctimai Birliyinin rəhbəri Hafiz Həsənov saxlanılıb. H.Həsənov sonradan ev dustaqlığına buraxılıb. 

Onlara qarşı Cinayət Məcəlləsinin 193-1.2.2, 193-1.2.3, 193-1.3.2 (cinayət yolu ilə əldə edilmiş xeyli miqdarda əmlakı vəzifə səlahiyyətlərindən istifadə etməklə təkrar leqallaşdırma), 308.1 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri üzrə ittiham irəli sürülüb. 

Apreldə isə ictimai fəal Asəf Əhmədov, sosial işçi Zamin Zəki və Əhməd Məmmədzadə də eyni ittihamlarla həbs edilib. Z.Zəki bu il martın 11-də 7 il yarım həbs cəzası alıb. Digər vətəndaş cəmiyyəti üzvü Aygül Pəncəliyevaya isə 2 il şərti cəza verilib. 

İqtisadçı Qalib Bayramov, hüquq müdafiəçisi Nərgiz Muxtarova və ABŞ-nin “German Marşal Fondu”nun Azərbaycan üzrə məsləhətçisi olmuş Mehriban Rəhimli barəsində polisin nəzarəti altına vermə tədbiri seçilib. Ölkə xaricində olan Sübhan Həsənli və Aytac Ağazadə isə axtarışa verilib.

İstintaqa 100-dən çox şəxs, o cümlədən beynəlxalq donor təşkilatlarının əməkdaşları və bəzi hökumətyönlü QHT rəhbərləri cəlb olunub.