Martın 4-də Bakı Ağır Cinayətlər Məhkəməsində "QHT işi" üzrə həbsdə olan sosial işçi Zamin Zəkinin işi üzrə növbəti məhkəmə prosesi keçirilib. 

"Azadlıq Radiosu"nun xəbərinə görə, hakim Elmin Rüstəmovun sədrliyi ilə keçirilən prosesdə dövlət ittihamçısı çıxış edərək Z.Zəkiyə 8 il həbs cəzası istəyib. 

Təqsirləndirilən şəxsin vəkili Günay İsmayılova müdafiə nitqinə hazırlaşmaq üçün vaxt istədiyindən məhkəmə prosesi martın 11-ə təxirə salınıb. 

Cinayət işində iddia olunur ki, Z.Zəki xarici təşkilatlardan aldığı qrant vəsaitlərini qanunvericilik üzrə qeydiyyatdan keçirməyib. 

Sosial işçi isə özünü təqsirli bilmir və ictimai fəaliyyətinə görə cəzalandırıldığını deyir.

Vəkil də məhkəmədə deyib ki, qrant vəsaitini cinayət yoluyla əldə edilmiş əmlak kimi təqdim etmək hüquqa ziddir: "Qrantın qeydiyyatdan keçirilməməsi uzaqbaşı inzibati xəta kimi qiymətləndirilə bilər." 

Z.Zəki 2025-ci ilin aprelində həbs olunub. O, Cinayət Məcəlləsinin 193-1-ci (cinayət yolu ilə əldə edilmiş əmlakı leqallaşdırma), 308-ci (vəzifə səlahiyyətlərindən sui-istifadə etmə) və 313-cü (vəzifə saxtakarlığı) maddələri üzrə ittiham olunur. 

"QHT işi” üzrə həbslər 2025-ci ilin martında başlayıb. Vətəndaş Hüquqları İnstitutunun rəhbəri Bəşir Süleymanlı, "Seçki Müşahidə" Alyansının icraçı direktoru Məmməd Alpay və "Hüquq və İnkişaf" İctimai Birliyinin rəhbəri Hafiz Həsənov saxlanılıb. H.Həsənov sonradan ev dustaqlığına buraxılıb. 

Onlara qarşı Cinayət Məcəlləsinin vəzifə saxtakarlığı və qanunsuz pul vəsaitlərini leqallaşdırma daxil olmaqla bir neçə maddəsi üzrə ittiham irəli sürülüb. 

Apreldə isə ictimai fəal Asəf Əhmədov, sosial işçi Zamin Zəki və Əhməd Məmmədzadə də eyni ittihamla həbs edilib. 

İqtisadçı Qalib Bayramov, hüquq müdafiəçisi Nərgiz Muxtarova və ABŞ-nin “German Marşal Fondu”nun Azərbaycan üzrə məsləhətçisi olmuş Mehriban Rəhimli barəsində polisin nəzarəti altına vermə tədbiri seçilib. Ölkə xaricində olan Sübhan Həsənli və Aytac Ağazadə isə axtarışa verilib.

İstintaqa 100-dən çox şəxs, o cümlədən beynəlxalq donor təşkilatlarının əməkdaşları və bəzi hökumətyönlü QHT rəhbərləri cəlb olunub.