“Şahnaz Bəylərqızının ifadəsində rezonans doğuracaq hansısa məqamdan söhbət gedə bilməz”.

Bunu Toplum TV-yə fevralın 14-də yerli mediada jurnalist Şahnaz Bəylərqızı ilə bağlı dərc edilən xəbərlə əlaqədar müdafiə tərəfi deyib.

Müdafiə tərəfi istintaq sirri təşkil etdiyini əsas gətirərək ifadənin detallarını açıqlamayıb. 

Lakin bildirib ki, Şahnaz Bəylərqızı sadəcə öz fəaliyyətinə aid olan hissə ilə bağlı ifadə verib.

Fevralın 14-də hökumətə yaxın bir neçə yerli media orqanında “Şahnaz Bəylərqızının etirafları açıqlanarsa, ölkə gündəmində sensasiya yaranar” sərlövhəli yazı dərc olunub.

Toplum TV-nin dəqiqləşdirdiyi məlumata əsasən, dərc edilən xəbərlər ictimaiyyəti çaşdırmaq cəhdindən başqa bir şey deyil.

"Toplum TV"də aparıcı və redaktor işləmiş jurnalist Şahnaz Bəylərqızı fevralın 5-də “Toplum TV” işi üzrə şübhəli şəxs qismində saxlanılıb, onun mənzilində axtarış aparılıb, evdən elektron əşyalar götürülüb.

Fevralın 6-da isə Xətai rayon Məhkəməsində onun barəsində 3 ay 15 gün müddətində həbs-qətimkan tədbiri seçilib.

Bu iş üzrə ümumilikdə 10 nəfərə cinayət işi açılıb: III Respublika Platformasının spikeri Akif Qurbanov, bu qurumun qurucu heyət üzvü Ruslan İzzətli, Toplum TV-də aparıcı və Redaktor olmuş Şahnaz Bəylərqızı, Toplum TV-nin təsisçisi Ələsgər Məmmədli, videoredaktor Müşfiq Cabbar, jurnalist Fərid İsmayılov, Toplum TV-nin əməkdaşı və Elmir Abbasov, Demokratik Təşəbbüslər İnstitutunun əməkdaşları Əli Zeynal, İlkin Əmrahov, Ramil Babayev.

Onlardan təkcə Elmir Abbasov polis nəzarətinə verilib.

"Toplum TV iş”i üzrə həbs edilənlər öncə qaçaqmalçılıqda ittiham edilsələr də, sonradan ittiham ağırlaşdırılıb.

Onlar ittihamları rədd edir, siyasi sifariş əsasında həbs olunduqlarını bildirirlər.

2023-cü ilin noyabrından başlayaraq Azərbaycanda qruplar halında təxminən 30 jurnalist, ictimai fəal qaçaqmalçılıq ittihamı ilə həbs edilib

Azərbaycan hakimiyyəti isə heç kimi peşə fəaliyyətinə və ya siyasi fəaliyyətinə görə təqib etmədiyini, ölkədə bütün hüquq və azadlıqların təmin olunduğunu bildirir.