Martın 5-də Naxçıvana edilən dron hücumları Azərbaycanın hava hücumundan müdafiə imkanları barədə suallar yaratdı. 

Azərbaycan Müdafiə Nazirliyinin məlumatına görə, İran tərəfindən buraxılan 4 drondan biri zərərsizləşdirilib, “digərləri isə mülki infrastrukturu, o cümlədən dərs saatlarında orta məktəb binasını hədəfə alıb”. 

Rəsmi məlumatda yer almasa da, mətbuatda dronlardan birinin Dövlət Sərhəd Xidmətinə məxsus hərbi bazaya ziyan vurduğunu göstərən fotolar yer alıb. Sonradan həmin fotolar hökumətyönlü saytlardan silinib. 

İran Naxçıvana atılan dronlara görə məsuliyyəti öz üzərinə götürməsə də, fevralın 28-dən - ABŞ və İsrailin hücumlarına məruz qaldığı gündən bəri İsrailə, eləcə də ABŞ hərbi bazalarının yerləşdiyi Fars körfəzi ölkələrinə dronlar buraxdığını inkar etmir. Bu dronların əksəriyyəti zərərsizləşdirilsə də, bəziləri hədəfləri nişan almağa nail olur. 

Ekspertlər İrana məxsus “Shahed” dronlarının uğurunu onların alçaqdan uçması və kütləvi şəkildə buraxılması ilə izah edirlər. 

Yerli təhlilçilər isə Naxçıvana atılan dronların üçünün qarşısının alınmamasını İranın bu bölgə ilə qonşu olması, dronların yaxın məsafədən buraxıla bilməsi ilə izah edir. 

Lakin İkinci Qarabağ Müharibəsi dövründə də Azərbaycanın hava hücumundan müdafiə (HHM) imkanları tənqid olunurdu. 2020-ci ilin oktyabrında Emənistandan Gəncəyə 5 fərqli gündə raketlər atılmış, ümumilikdə 27 mülki şəxs həlak olmuşdu. 27-28 oktyabr tarixlərində Bərdəyə atılan klaster tipli raketlər isə 26 nəfərin həyatına son qoymuşdu. 

Hərbi ekspert Cəsur Məmmədov “Toplum TV”-yə deyir ki, Naxçıvana edilən hücum Azərbaycanın HHM sahəsində islahatlara ehtiyac olduğunu göstərib. 

“Burada məsuliyyətsizliklə yanaşı, hücumun gözlənilməz yerdən gəlməsi də rol oynayıb. Azərbaycanın Hərbi Hava Qüvvələri və Hava Hücumundan Müdafiə Qoşunları uzun illər, əsasən, Ermənistan və keçmiş Dağlıq Qarabağ ərazisindən gələ biləcək hücumlara qarşı özünü hazırlayıb. Təlimlər də məhz bu istiqamətdən gələcək təhlükəni dəf etmək məqsədilə aparılıb. İran isə yeni istiqamətdir. Buna görə də, HHM hərbçilərinin bilik və bacarıqlarının artırılmasına və yeni təlimlərin keçirilməsinə ehtiyac var”, - o qeyd edib. 

İkinci Qarabağ Müharibəsində qalib gəlməsinə, habelə 2023-cü ilin sentyabrında Qarabağ üzərində suverenliyi bərpa etməsinə baxmayaraq, Azərbaycan hərbi xərcləri artırmağa davam edir. 

2026-cı ilin dövlət büdcəsində bu xərclər 8 milyard manat və ya ümumi büdcənin 21%-i qədər nəzərdə tutulub. Bu büdcənin nə qədər hissəsinin məhz HHM üçün ayrıldığı barədə isə məlumat verilmir. 

Lakin C.Məmmədov deyir ki, verilən rəsmi açıqlamalardan Azərbaycanın silahlı qüvvələrlə bağlı iki sahəni prioritetləşdirdiyi aydın olur: komando heyətlərinin təkmilləşdirilməsi və HHM sistemlərinin gücləndirilməsi. 

“Yəqin ki, Naxçıvanda baş verən hadisə ilə bağlı orduda cəzalandırma tədbirləri görülüb, sadəcə açıqlanmır. Həm də böyük ehtimalla HHMQ-nın hərbi hissələrinə ayıq-sayıq olmaq, təlimlər keçirmək, bilik və bacarıqların artırılması istiqamətində tapşırıqlar verilib”, - o əlavə edib.