Azərbaycan Xalq Cəbhəsi Partiyasının (AXCP) həbsdə olan sədri Əli Kərimlinin Hüquqlarını Müdafiə Komitəsi siyasətçiyə qarşı hüquq pozuntularının davam etdiyini bildirib. 

Avqustun 1-də yayılan bəyanata əsasən, Dövlət Təhlükəsizliyi Xidmətinin (DTX) istintaq təcridxanasında saxlanılan Ə.Kərimlinin saxlanma şəraiti "məqsədli şəkildə ağırlaşdırılır". 

Məlumata görə, partiya sədrinə iki aydır ailəsi ilə telefon danışığı və görüş qadağan olunub. Eyni zamanda onun hələ də psixi problemli şəxslə eyni kamerada saxlanıldığı bildirilir. "Bu şəxs hər gün gecə saat 3-4 radələrində oyanaraq səhərə qədər kamerada səs-küy salır, başını divara vurur, qışqıraraq yatmağa imkan vermir", - deyə əlavə olunub. 

Komitənin sözlərinə görə, günün digər vaxtlarında da Ə.Kərimlinin istirahət hüququnu pozan əməllər törədilir. 

"Əli Kərimlinin saxlanıldığı kameranın qarşısına qoyulmuş telefon aparatı axşam saatlarından başlayaraq səhər saat 6-ya qədər hər 15 dəqiqədən bir zəng çalır və yatmağa mane olur. DTX-nin həyətində Əli Kərimlinin saxlanıldığı kameraya yaxın yerdə başlanmış təmir işləri üzündən yaranan səs-küyə görə gündüz saatlarında da yatmaq mümkün olmur", - deyə qeyd olunub.

Əlavə olaraq, Ə.Kərimliyə səhər yeməyi üçün gətirilən ərzaq sovqatının qəbul edilmədiyi, gəzinti saatlarının yarıbayarı azaldıldığı, sanitar qovşağın 3 həftədir təmizlənmədiyi, elektrik cərəyanı verilişinin iki aya yaxındır söndürüldüyü və siyasətçiyə qəzet, jurnal və digər qeydlərin verilməsinin qadağan edildiyi bildirilir. 

"Məqsədli şəkildə Əli Kərimlinin yuxusunu pozmaq, saxlandığı kamerada antisanitariya vəziyyəti yaratmaq insan ləyaqətini alçaldan rəftar olmaqla yanaşı, onun sağlamlığına zərbə vurmaq məqsədi daşıyan işgəncə aktları kimi qiymətləndirilməlidir", - bəyanatda deyilir. 

Əli Kərimlinin Hüquqlarını Müdafiə Komitəsi beynəlxalq ictimaiyyəti bu məsələlərə "adekvat münasibət bildirməyə və müstəqil monitorinq komissiyası yaradaraq proses diqqətdə saxlamağa" çağırıb. 

DTX və Penitensiar Xidmət iddialara münasibət bildirməyib. 

Əli Kərimli ötən il dekabrın 1-də həbs olunub. Ona qarşı Cinayət Məcəlləsinin 278.1-ci (hakimiyyəti zorla ələ keçirməyə, dövlətin konstitusiya quruluşunu zorla dəyişdirməyə yönələn hərəkətlər) maddəsi ilə ittiham irəli sürülüb.

Onunla yanaşı AXCP Ali Məclisinin katibi Məmməd İbrahim də eyni ittihamla həbs olunub. Onlar ittihamları rədd edir, hakimiyyətin sifarişi ilə həbs olunduqlarını bildirirlər.