Həbsdə olan keçmiş deputat və iş adamı Nazim Bəydəmirli Ədliyyə naziri Fərid Əhmədova müraciət ünvanlayıb.
O, saxlanıldığı 6 saylı cəzaçəkmə müəssisəsində hüquqlarının məhdudlaşdırıldığını, səhhəti ilə bağlı müraciətlərinə isə cavab verilmədiyini bildirib.

N.Bəydəmirli yazıb ki, səbəbini bilmədiyi halda ona qanunla nəzərdə tutulan hüquqlar baxımından fərqli yanaşılır:
“Video görüntülərin bərpa edilməsi ilə bağlı müraciətlərə müsbət cavab verilmir, həyat yoldaşıma baş etibarnamənin rəsmiləşdirilməsi mümkün olmur, həmçinin lazımi tibbi yardım və həkimlə təmin olunmuram”.

Bəydəmirli bildirib ki, 13 saylı cəzaçəkmə müəssisəsindən 6 saylı müəssisəyə köçürüldükdən sonra beş aydır karantində saxlanılır və ailəsi ilə videogörüş imkanından məhrum edilib. Onun sözlərinə görə, üç ildən artıqdır qızını yalnız videogörüntü vasitəsilə görə bilirdi.

Keçmiş deputat müraciətində səhhətində ciddi problemlərin yarandığını da qeyd edib.
“Səhhətimdə yaranan ciddi problemlərin həlli üçün dəfələrlə müraciət olunub. Təcili analiz və müalicəyə ehtiyacım var. Üstəlik, diş implantının istismar müddəti bitdiyi üçün şiddətli ağrıdan əziyyət çəkirəm. İndiyədək heç bir tədbir görülməyib”, - o bildirib.

Bəydəmirlinin həyat yoldaşı Fəridə Bəydəmirli iyulun 2-də Penitensiar Xidmətin rəisi Mirsaleh Seyidovun, sentyabrın 17-də isə Ədliyyə Nazirliyinin Baş Tibb İdarəsinin rəisi Cəmil Kamillinin qəbulunda olub. Müraciətdə bu görüşlərə baxmayaraq, problemlərin həlli üçün addım atılmadığı iddia edilir.

Nazim Bəydəmirli Ədliyyə Nazirliyindən müraciətinə baxılmasını istəyib.

Ədliyyə Nazirliyi və Penitensiar Xidmətin məsələyə münasibəti hələlik məlum deyil.
Nazim Bəydəmirli 2023-cü ilin iyulun 4-də saxlanılıb. Bundan əvvəl, iyunda Söyüdlü hadisələri zamanı polisin davranışını tənqid etmişdi.

Ona ilkin olaraq Cinayət Məcəlləsinin hədə-qorxu ilə tələb etmə maddəsi ilə ittiham irəli sürülüb. Sonradan ittiham ağırlaşdırılıb.

2024-cü il sentyabrın 30-da məhkəmə N.Bəydəmirliyə 8 il azadlıqdan məhrumetmə cəzası verib. O, ittihamları rədd edir və özünü “ekologiya məhbusu” adlandırır. Hüquq müdafiəçiləri onu siyasi məhbus kimi tanıyıblar.