"Toplum TV"nin həbsdə olan həmtəsisçisi, media eksperti Ələsgər Məmmədlinin bu yaxınlarda keçdiyi tibbi müayinənin nəticələri ona təqdim olunub. 

Bu barədə sentyabrın 9-da onun qardaşı, siyasi şərhçi Nəsimi Məmmədli sosial media hesabında məlumat verib. 

"Ultrasəs (USM) müayinəsinin nəticələrinə əsasən, qalxanabənzər vəzidə iki düyün izlənilir. Düyünlərin ölçüləri 19×8 mm və 3×2 mm-dir. Prostat vəzinin sol payında bərkimə sahəsi aşkar edilib. Bağırsaqlarda meteorizm, onikibarmaq bağırsaqda isə “bağırsaq daşları” kimi qeyd olunan dəyişikliklər müşahidə edilib", - o qeyd edib. 

N.Məmmədlinin sözlərinə görə, nəticələrlə tanış olduqdan sonra qardaşının səhhəti ilə bağlı narahatlıqları daha da artıb.

"Məsələ burasındadır ki, bu nəticələrin Ələsgər bəyin səhhətinin real vəziyyətini tam və dəqiq əks etdirib-etdirmədiyi ilə bağlı ciddi suallarımız var. Peşəkar həkimlərin fikrincə, yalnız bu USM nəticələrinə əsaslanaraq yekun tibbi qiymətləndirmə aparmaq mümkün deyil", - o əlavə edib. 

N.Məmmədli xatırladıb ki, həbsindən əvvəl Ə.Məmmədlinin qalxanabənzər vəzisinin müayinəsi zamanı təxminən 23 millimetr ölçüdə düyün aşkar edilmişdi. Həbs müddətində isə müxtəlif vaxtlarda üç dəfə USM müayinəsi aparılıb və həmin müayinələrin nəticələri bir-birindən xeyli fərqlənib.

"Üstəlik, qalxanabənzər vəzidə düyünün qiymətləndirilməsi zamanı yalnız onun ölçüsü əsas götürülmür. Düyünün tərkibi, exogenliyi, sərhədləri, forması, kalsifikasiyaların olub-olmaması və digər USM xüsusiyyətləri də mütləq nəzərə alınmalıdır. Məhz bu göstəricilər düyünün bədxassəlilik riskinin qiymətləndirilməsində mühüm əhəmiyyət daşıyır", - o bildirib. 

N.Məmmədli qalxanabənzər vəzində əvvəllər aşkar edilmiş düyünün hazırkı vəziyyətinin əvvəlki müayinələrlə müqayisəli şəkildə, ixtisaslaşmış endokrinoloq tərəfindən yenidən qiymətləndirilməsinin vacibliyini qeyd edib. O, prostat vəzi və mədə-bağırsaq üçün də dəqiq diaqnoz üçün əlavə müayinələrin aparılmalı olduğunu əlavə edib. 

"Ümumilikdə, hər hansı orqanda struktur dəyişiklik aşkar edildikdə yalnız ilkin və məhdud müayinə ilə kifayətlənmək düzgün deyil. Aşkar edilmiş dəyişikliklərin xarakteri, ölçüsü, dinamikası, yayılma dərəcəsi və mümkün səbəbləri hərtərəfli araşdırılmalıdır. Bunun üçün klinik müayinə, laborator analizlər, uyğun görüntüləmə üsulları və zəruri instrumental müayinələr birlikdə qiymətləndirilməlidir. Əks halda, aşkar edilmiş struktur dəyişikliklərin mahiyyətini və klinik əhəmiyyətini dəqiq müəyyən etmək mümkün olmaya bilər", - o qeyd edib. 

Qardaşı əlavə edib ki, ehtiyac yarandığı halda Ə.Məmmədlinin özəl tibb müəssisəsində müayinə və müalicə almasına imkan yaradılmalıdır.

Ələsgər Məmmədli 2024-cü il martın 8-də Bakıda klinikalardan birindən çıxarkən mülki geyimli şəxslər tərəfindən saxlanılıb və həbs olunub.
Ailəsi və vəkilləri mütəmadi olaraq onun səhhətindəki problemlərlə bağlı narahatlıqlarını dilə gətirirlər. Vəkili bu səbəbdən onun ev dustaqlığına buraxılması üçün dəfələrlə vəsatət qaldırsa da, indiyədək heç biri təmin edilməyib.

İyulun 27-də "Toplum TV işi" üzrə keçirilən yekun məhkəmə prosesində Ə.Məmmədliyə 14 il həbs cəzası verilib.
O, qaçaqmalçılıq, vergidən yayınma və qanunsuz sahibkarlıq da daxil olmaqla bir sıra cinayətlərdə ittiham olunur. Ə.Məmmədli ittihamları qəbul etmir, hakimiyyətin sifarişi ilə həbs olunduğunu bildirir.