Rusiyadan qayıdan bəzi Ordubad sakinlərinin evlərindən götürülərək zorla polis idarəsinə aparıldığı bildirilir. 

Şikayətçilər bu barədə “Gündəlik Naxçıvan”a bildiriblər.

Onların sözlərinə görə, həkim nəzarəti olmadan rayon polis şöbəsinin sanitar qovşağında narkotik maddə istifadəsi ilə bağlı testdən keçirilirlər.

Təhlükəsizlik səbəbilə adının açıqlanmasını istəməyən şəxs deyir ki, testin nəticəsi mənfi çıxsa da, ona ‘narkotik istifadəçisi damğası’ vurulacağı ilə hədələnib. Onun sözlərinə görə, nəticədə 5 min manat verməyə məcbur olub.

“Təkcə mənim yox, bir neçə tanıdığım adamın da başına eyni şey gəlib. Rusiyadan gələn kimi evdən götürüb, aparıb şöbədə test edirlər. Polis idarəsinin tualeti müavinin test mərkəzinə çevrilib. Nəticə mənfi çıxsa da, dedilər ki, bizim əlimizdədir, elə edərik ki, müsbət çıxar. Ya 10 min gətir, ya da həbsə gedirsən. İşgəncə verməklə də hədələdilər. Məcbur qaldım, yalvar-yapış 5 minə salıb rüşvəti verib canımı qurtardım. Adam öz el-obasına gəlmək istəmir. Vallah, üç gün olar Moskvaya qayıtmışam, bir də qələt edib Naxçıvana gedərəm”, - Ordubad sakini bildirib.

Adının açıqlanmasını istəməyən digər iş adamı isə prosesin necə baş verdiyini “Gündəlik Naxçıvan”a belə təsvir edib:

“Qapımıza gəlib dedilər ki, rəis müavini səni yanına çağırır. Səbəbini soruşanda ‘orada özü deyəcək’ cavabını verdilər. Bir az etiraz edəndə təzyiq göstərməyə başladılar. İdarədə məndən Rusiyada narkotik istifadə edib-etmədiyimi soruşdular. Dedim ki, istifadə etməmişəm.
Məni tualetə apardılar, stəkan verdilər ki, sidiyi bunun içində gətir. Sonra bir paket açıb içindəkini stəkana saldılar və bir qədər gözlədilər”.

Şikayətçi qeyd edib ki, onun da testinin cavabı mənfi çıxıb. “Buna baxmayaraq, oradan çıxanda elə danışırdılar ki, sanki narkotik istifadə etmədiyimə görə narazı qalmışdılar”, - Ordubad sakini bildirib.

Şikayətçilər Rusiyadan qayıdan şəxslərin hansı meyarla bu cür yoxlamalara cəlb edildiyinə aydınlıq gətirilməsini tələb edirlər.

“Toplum TV” iddialarla bağlı Naxçıvan MR Daxili İşlər Nazirliyinə sorğu göndərib. Yazı dərc olunanadək sorğuya cavab verilməyib.