Arqument.az saytının baş redaktoru, jurnalist Şəmşad Ağa fevralın 5-i gecə saatlarında şübhəli şəxs qismində saxlanılıb. 

Vəkil Şəhla Hümbətova onun “Meydan TV işi” çərçivəsində saxlanıldığını bildirir. Jurnalistin Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə təqsirli bilindiyi deyilir. 

Bundan öncə qardaşı Şahid Ağayev “Amerikanın Səsi”nə onun saxlanılması haqda məlumat vermişdi.

Onun sözlərinə görə, gecə saat 2 radələrində maskalı polis əməkdaşları evə gələrək axtarış aparıblar, Şəmşad Ağaya məxsus bəzi əşyaları götürüblər. 

“Gecə saat 2 radələrində müstəntiq və 7-8 maskalı polis əməkdaşı qapımızı döydü. Qapını açanda Şəmşadı gördüm. Polislər evimizə girdilər, hər yeri axtardılar. Şəmşadın köhnə telefonunu, mənim telefonumu, yaddaş kartlarını, bir neçə köhnə diski, komputeri, modemi, Şəmşada aid olan jurnalist vəsiqələrini götürdülər. Daha sonra protokol tərtib etdilər. Şəmşad yalnız dedi ki, onu tutublar. Hansı işlə bağlı tutduqları barədə bir söz demədi”, qardaşı söyləyib. 

Şəmşad Ağa bir neçə il öncə “Toplum TV”-də “Debat” verilişinin aparıcısı olub.

Ötən il iyulun 5-də jurnalist Bakı Şəhər Baş Polis İdarəsində “Toplum TV işi” üzrə şahid qismində dindirilib. İstintaq orqanı onun ölkədən çıxışına qadağa qoyub.

Ötən il dekabrın 6-da “Meydan TV işi” üzrə nəşrin baş redaktoru Aynur Elgünəş, jurnalistlər Aytac Tapdıq, Natiq Cavadlı, Xəyalə Ağayeva, Aysel Umudova, Ramin Deko  və Bakı Jurnalistika Məktəbinin direktor müavini Ülvi Tahirov həbs ediliblər. Qaçaqmalçılıqda ittiham olunan jurnalistlər peşə fəaliyyətinə görə cəzalandırıldıqlarını bildirirlər. 

Son zamanlar ölkədə 20-dən çox jurnalist həbs edilib. Bunların əksəriyyəti “Abzas Media”, “Toplum TV” və “Meydan TV”-nin əməkdaşlarıdır. Onların hamısı rəsmi ittihamı rədd edir, hakimiyyəti tənqid etdiklərinə, korrupsiya araşdırmalarına görə həbsdə olduqlarını deyirlər. 

Azərbaycan hakimiyyətisə ölkədə söz, fikir azadlığı daxil bütün hüquq və azadlıqların təmin edildiyini, heç kimin peşə fəaliyyətinə görə təqib olunmadığını bildirir.