Apellyasiya Məhkəməsi Nərimanov Rayon Məhkəməsinin iqtisadçı alim və siyasətçi Qubad İbadoğlunun ailəsinə məxsus əmlakın üzərinə həbs qoyulması barədə qərardadından verilən şikayəti təmin etməyib.

Bu haqda “Turan”a danışan Q.İbadoğlu ailəsinə aid dörd mənzilin sənədlərini məhkəməyə təqdim etdiyini bildirib. 

“Ailəmizin maliyyə mənbələri və mənzillərin vərəsəliklə ailmizə keçməsi barədə sənədləri hakimlərə təqdim etdik. Əmlak həyat yoldaşıma məxsusdur, mənzillər 90-cı illərdə vərəsəlik hüququ ilə həyat yoldaşımın adına keçən mənzillərin satışından əldə edilən vəsaitlə alınıb. Amma məhkəmə qanuni qərar qəbul etmək əvəzinə, təqdim etdiyimiz sənədləri araşırmadan, Nərimanov Rayon Məhkəməsinin qərardadını qüvvədə saxladı”, Qubad İbadoğlu deyib.

O, qərardan Avropa İnsan Hüquqları Məhkəməsinə şikayət veriləcəyini qeyd edib.

Səhhətinin pisləşməkdə davam etdiyini söyləyən İbadoğlu ümidin ancaq dərmanlara və Allaha qaldığını bildirib. 

“Artıq həkimlər də məni müayinə və müalicə etməkdən imtina edirlər, çəkinirlər. Hətta son dəfə müraciət etdiyim həkimin sualı ondan ibarət oldu ki, xəstəxanaya gəlmək üçün icazə almısınızmı?”

O, Azərbaycanda adekvat tibbi yardım ala bilmədiyini, vəziyyətinin əvvəlkindən daha pis olduğunu vurğulayıb: 

“Son müayinə altı ay əvvəl keçirilmişdi. Müayinə göstərdi ki, daha əvvəlki altı ayda damarda genişlənmə artıb. Bu, tibdə sürətli inkişaf sayılır və indi cərrahi müdaxilə səviyyəsindəyik. Bu, mənim həyatım üçün kifatyət qədər risklidir".

Haqqındakı cinayət işinin təhqiqatının ötən il iyulun 29-da dayandırıldığını söyləyən iqtisadçı həmin vaxtdan özünə və vəkillərinə heç bir əlavə məlumat verilmədiyini bildirib.

Qubad İbadoğlu 2023-cü ilin iyulunda həbs edilərək Cinayət Məcəlləsinin 204.3.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma - eyni əməllər mütəşəkkil dəstə tərəfindən törədildikdə) və 167-3.1-ci (Dini ekstremist materialları, yəni dini ekstremist fəaliyyəti həyata keçirməyə çağıran və ya belə fəaliyyəti əsaslandıran, yaxud belə fəaliyyətin zəruriliyinə bəraət qazandıran materialları hazırlama, saxlama və ya yayma) maddələri ilə ittiham olunub. Özü ittihamları rədd edir. 

2024-cü ilin aprelində Qubad İbadoğlu ev dustaqlığına buraxılıb, mayda isə o, polis nəzarətinə verilib. 

Ötən ilin noyabrında isə onun ailəsinə məxsus daşınmaz əmlakın müsadirəsi haqqında qərar qəbul edilib.