Gürcüstanın paytaxtı Tbilisidə Heydər Əliyev adına Mədəniyyət Mərkəzinin tikilməsi planlaşdırılan Abanotubani adlı ərazinin sakinləri layihəyə etiraz edirlər. 

"Meydan TV"-yə danışan sakinlər heç bir halda evlərini tərk etməyəcəklərini bildiriblər. 

Gürcüstanın İqtisadiyyat Nazirliyinin aprelin 7-də verdiyi əmrə əsasən, mərkəzin tikilməsi üçün dövlətlə bir neçə sahibkar arasında 5380 kvadrat metrlik torpaq sahəsinin alınması üzrə artıq razılaşma əldə olunub. Sənəddə, həmçinin, bildirilir ki, 5 sakin torpaqlarının satışına razı olmayıb və dövlət buna görə də onların torpaqlarını müsadirə yolu ilə əldə edəcək. 

"Azərbaycan hökuməti razı olarmı ki, Bakının ən tarixi yerində Gürcüstana aid mədəniyyət ocağı, teatr və ya səfirlik tikilsin? Axı bu, ədalətsizlikdir. Biz qarşılıqlı hörmət istəyirik. Bizə lap milyonlar, villalar da versələr, buradan çıxmayacağıq. Biz burada qədim tariximizi qoruyuruq", - Nino Talakvadze adlı sakin deyib. 

Maya İzoria adlı sakin isə mərkəzin tikintisi üçün başqa ərazinin tapılmasını təklif edib. 

"Bura gürcü mədəniyyət ocağıdır. Belə çıxır ki, Gürcüstan üçün özümüzün yox, Azərbaycanın mədəniyyəti prioritetdir? Gürcüstanda gürcü mədəniyyəti Azərbaycana görə məhv edilir. Biz məhəlləmizdən çıxmayacağıq", - o əlavə edib. 

Marika İzoria adlı sakin isə ərazidə 50 ildir yaşadığını deyib. 

"Buranı tərk etməyə razı olanlar burada müvəqqəti yaşayanlar idi. Biz isə buranın köklü sakinləriyik. Sona qədər etiraz edəcəm, dağıntıların içində yaşayacam. Qoy bizim dırnaqarası hökumət bilsin ki, [Azərbaycan prezidenti] İlham Əliyev o hörmətə layiq deyil", - o qeyd edib. 

Əslən Azərbaycanın Qax rayonundan olan Dariko Papuaşvili isə deyib ki, ərazidəki Azərbaycan səfirliyinin binasının təmiri zamanı yaşadığı evə zərər dəyib, lakin bu günə qədər təmir olunmayıb. 

"Aldatdılar, dedilər ki, qorxma, iş bitəndən sonra gəlib təmir edəcəyik. 11-12 il keçdi, heç kim gəlib bir söz demədi. Ona görə mənim ürəyim ağrıyır. Azərbaycanlılar gələndə mən onlara kömək edirəm. Niyə mən indi məhkəməyə getməliyəm, niyə yalvarmalıyam ki, məni çıxarmayın evimdən?", - o sual edib.