ABŞ Mərkəzi Komandanlığı (CENTCOM) İranın hava hücumundan müdafiə sistemlərinə, sahil radar məntəqələrinə, raket və pilotsuz uçuş aparatları komplekslərinə, həmçinin Hörmüz boğazında yerləşən kiçik hərbi gəmilərə zərbələr endirdiyini açıqlayıb.

CENTCOM-un bəyanatında bildirilir ki, Hörmüz boğazı qlobal ticarət üçün həyati əhəmiyyət daşıyan dəniz yoludur və İran bu boğaza nəzarət etmir.

Qurumun məlumatına görə, zərbələr nəticəsində Küveytdə yerləşən ABŞ hərbi bazalarındakı "HIMARS" və "Patriot" raket sistemləri, yanacaq çənləri, radiolokasiya stansiyası və raket anbarları da hədəfə alınıb.

İran mediası ölkənin Mərkəzi, Hörmüzqan və Xuzistan vilayətlərində, eləcə də Keşm və Çabahar şəhərlərində partlayış səslərinin eşidildiyini yazıb.

Xuzistan vilayətinin rəsmilərinin məlumatına görə, Mahşəhr şəhərinə endirilən zərbələr nəticəsində bir nəfər ölüb, daha dörd nəfər yaralanıb.

Bundan əvvəl "Axios" nəşrinin jurnalisti Barak Ravid "X" hesabında ABŞ Mərkəzi Komandanlığının nümayəndəsi Tom Hokinsə istinadən yazmışdı ki, İran İslam İnqilabı Keşikçiləri Korpusu (SEPAH) Hörmüz boğazından keçən ticarət gəmilərinə atəş açıb.

SEPAH isə öz növbəsində Bəhreyndə yerləşən Şeyx-İsa hərbi bazasında helikopterlərin təmiri və texniki xidməti mərkəzlərini, "Boeing P-8A Poseidon" təyyarəsinin saxlanıldığı anqarı və pilotsuz uçuş aparatlarının idarəetmə mərkəzini vurduğunu açıqlayıb.

İyulun 11-i axşam saatlarında SEPAH ABŞ-nin bölgəyə müdaxiləsi başa çatanadək və əlavə göstəriş verilənədək Hörmüz boğazının bağlandığını rəsmən elan edib.

İran bildirib ki, gəmilər boğazdan yalnız Tehranla razılaşdırılmış marşrut üzrə, boğazın şimal hissəsindən keçə bilər. ABŞ və digər ölkələr isə bu mövqeyi qəbul etmirlər.
SEPAH-ın bəyanatından əvvəl İranın xarici işlər naziri Abbas Əraqçı Omanda danışıqlar aparıb. Görüşdə digər məsələlərlə yanaşı, Hörmüz boğazında gəmiçiliyin təşkili də müzakirə olunub. Danışıqların yekununa dair rəsmi açıqlama verilməyib.