Ermənistanın Korrupsiyaya Qarşı Mübarizə Məhkəməsi ölkənin keçmiş prezidenti Robert Koçaryan barəsində iki aylıq həbs qətimkan tədbiri seçib. Bu barədə “Azadlıq Radiosu”nun Ermənistan xidməti məlumat yayıb.

Koçaryan hazırda xəstəxanadadır. Onun barəsində həbs qətimkan tədbirinin seçilməsi ilə bağlı istintaqın vəsatətinə avqustun 26-da axşam saatlarında baxılmağa başlanılıb. Keçmiş prezident əvvəlcə məhkəməyə gətirilsə də, daha sonra yenidən xəstəxanaya qaytarılıb və iclas onun iştirakı olmadan davam etdirilib.

Koçaryan avqustun 25-də evində aparılan axtarışdan sonra saxlanılaraq Korrupsiyaya Qarşı Mübarizə Komitəsinə aparılıb. Səhhəti pisləşdiyindən daha sonra xəstəxanaya yerləşdirilib.

Oğlu Levon Koçaryanın sözlərinə görə, keçmiş prezidentin ürəyində problemlər var və o, iki həftə əvvəl əməliyyat keçirib.

Robert Koçaryana vəzifə səlahiyyətlərindən sui-istifadə, xüsusilə külli miqdarda cinayət yolu ilə əldə edilmiş əmlakın leqallaşdırılması və xüsusilə külli miqdarda rüşvət alma ittihamları irəli sürülüb.

İstintaqın versiyasına görə, Koçaryan vəzifə səlahiyyətlərindən istifadə edərək yaxın tərəfdarları ilə əvvəlcədən razılaşma əsasında dövlət əmlakını mənimsəyib, həmçinin ictimai və iqtisadi əhəmiyyət daşıyan bir sıra qiymətli obyektlərin bazar dəyərindən xeyli aşağı qiymətə əldə olunmasını təmin edib.

Koçaryanın böyük oğlu Sedrak Koçaryan da bir gün əvvəl oxşar ittihamlarla həbs edilib.
Korrupsiya işi üzrə Robert və Sedrak Koçaryanla yanaşı, daha bir neçə nəfər təqsirləndirilən şəxs qismində cəlb olunub. Onların arasında Ermənistanın keçmiş prezidenti Serj Sarkisyan, keçmiş baş nazir Andranik Markaryan, Yerevanın keçmiş meri Qagik Beqlaryan və “Aygedzor” şirkətinin rəhbəri Aramais Vorskanyan da var.

Məlumata görə, iş çərçivəsində altı nəfər saxlanılıb, bir neçə onlarla ünvanda axtarış aparılıb.
Serj Sarkisyana isə Robert Koçaryanın prezidentliyi dövründə müdafiə naziri vəzifəsində çalışarkən səlahiyyətlərindən sui-istifadə etmə ittihamı irəli sürülüb. Onun ölkədən çıxışına qadağa qoyulub.