Latviyanın etirazı səbəbindən rusiyalı iş adamları Alişir Usmanov və Mixail Fridmana qarşı sanksiyaların ləğvi məsələsi təxirə düşüb.

LETA agentliyi bu barədə Latviyanın baş nazirinin ofisinə istinadən məlumat yayıb.

Latviya Xarici İşlər Nazirliyinin sözçüsü Liqa Yermakane nəşrə bildirib ki, Avropa İttifaqı (Aİ) səviyyəsində qərarın qəbulu prosesi davam edir və vəziyyət dəyişə bilər. O, nazirliyin yekun qəraradək ölkənin mövqeyini şərh eAvropa tməyəcəyini deyib.

Bir gün əvvəl “Reuters” avropalı diplomatlara istinadən Aİ ölkələrinin Usmanov və Fridmana qarşı sanksiyaların ləğvi barədə ilkin razılığa gəldiyini yazmışdı. Razılaşma Rusiyanın təxminən 2700 fiziki və hüquqi şəxsinə qarşı sanksiyaların müddətinin uzadılmasını da nəzərdə tuturdu.
Agentliyin məlumatına görə, Aİ üzvlərindən heç biri etiraz etməsəydi, qərar qüvvəyə minəcəkdi.
Ötən həftə isə Aİ ölkələrinin səfirləri sanksiyaların müddətini yalnız bir həftə uzatmağa razılaşıblar. Gecikməyə Fransa və Slovakiyanın iki iş adamının siyahıdan çıxarılmasını istəməsi səbəb olub.

“EUobserver”ə danışan fransalı diplomat Parisin Usmanova qarşı sanksiyaların ləğvini “milli təhlükəsizlik” məsələsi hesab etdiyini bildirib. Onun sözlərinə görə, Yelisey sarayı Usmanovla bağlı beynəlxalq tərəfdaşların müraciətlərinə müsbət cavab vermək istəyib.

“Financial Times”ın məlumatına görə isə Fransa Azərbaycanda həbsdə saxlanılan bir neçə vətəndaşının azad edilməsi barədə razılaşma çərçivəsində Usmanova qarşı sanksiyaların ləğvinə çalışıb.

Sözügedən razılaşmanın hansı Fransa vətəndaşlarını əhatə etdiyi barədə məlumat verilməyib. Azərbaycanda həbsdə olan Fransa vətəndaşlarından biri casusluq ittihamı ilə martda 10 il həbsə məhkum edilmiş Martin Rayandır. O, ittihamları rədd edir.

Digər Fransa vətəndaşı Teo Klerk isə ötən ilin sentyabrında metroda qraffiti çəkdiyinə görə 3 il həbsə məhkum edilib. Onunla eyni əmələ görə mühakimə olunan digər iki əcnəbi cərimə ilə cəzalandırılıb. Fransanın Azərbaycandakı səfirliyi hökmü pisləyərək Klerkin “açıq-aşkar ayrı-seçkilik xarakterli özbaşına rəftarın qurbanı” olduğunu bildirib.

Fransa vətəndaşlarının həbsi iki ölkə arasında mübahisə mövzularından biri olub. Azərbaycan prezidenti İlham Əliyev isə ötən ilin oktyabrında Fransa ilə anlaşılmazlığa səbəb olan məsələlərin artıq keçmişdə qaldığını bildirib.

Usmanov və Fridman Rusiya prezidenti Vladimir Putinə yaxınlıqları və Ukraynaya qarşı müharibənin maliyyələşdirilməsində iştirakları əsas gətirilərək sanksiya siyahılarına daxil ediliblər. Hər iki iş adamı sanksiyaların ləğvi üçün məhkəməyə müraciət edib.