İsrail hərbçiləri dekabrın 8-də - Suriya prezidenti Bəşər Əsədin devrilməsilə bağlı xəbərlər fonunda İsrail və Suriyanın Holan təpələrində yerləşən mövqeləri arasındakı bufer zonaya daxil olublar; eyni zamanda, ordakı “strateji mövqeləri” də nəzarətə götürüblər (Radio Svoboda). 

İsrailin Baş naziri Benyamin Netanyahu bunu həmin ərazidən yayımladığı videomüraciətdə deyib. Bildirilir ki, həmin zaman Netanyahu son vaxtlara qədər Dəməşqin nəzarətində olan ərazinin Holan təpələrilə həmsərhəd hissəsində olub.

O qeyd edib ki, Əsədin devrilməsi İsrail üçün həm yeni imkanlar açır, həm də müəyyən risklər yaradır. Netanyahunun sözlərinə görə, Suriya ordusu ərazidəki  mövqelərini tərk etdiyi üçün həmin ərazi bufer zona statusunu itirib və İsrail öz sərhədlərini qorumaq üçün ora qoşun yeridib. 

KİV-lər İsrail hərbçilərinin Hermon dağının Suriya yamacını nəzarətə götürdüyünü yazırlar. 

“Biz düşmən qüvvələrin sərhədlərimizdə möhkəmlənməsinə imkan verməyəcəyik” - Netanyahu belə deyib.

İsrail 1967-ci il müharibəsi zamanı işğal etdiyi Holan təpələrini öz ərazisi hesab edir. Dünyanın əksər ölkələri oranı Suriya ərazisi kimi tanıyır. İndi isə İsrail rəsmi olaraq özününkü elan etmədiyi əraziyə daxil olub.

Netanyahu videomüraciətində həmçinin deyib ki, Əsədin devrilməsi “rejimin əsas himayədarları olan İrana və “Hizbullah”a İsrailin hücumlarının nəticəsidir”. 

İran və Livanın ona yaxın olan radikal “Hizbullah” qruplaşması Suriyadakı vətəndaş müharibəsi illərində Əsədi fəal şəkildə dəstəkləsələr də, son qarşıdurmada ona kömək etmək üçün heç bir addım atmadılar. 

Şərhçilər qeyd edirlər ki, İsrailin hücumları “Hizbullah”ı xeyli zəiflədib. 

Paytaxt Dəməşqə və ölkə ərazisinin əhəmiyyətli bir hissəsinə nəzarəti ələ keçirən Suriya müxalifətinin aparıcı qüvvəsi İsraillə qarşıdurmanı davam etdirmək niyyətində olduqlarını bəyan edən qruplardır. Onların ən böyüyü ABŞ-ın terrorçu təşkilat kimi tanındığı “Heyət Təhrir əl-Şam” qruplaşmasıdır. 

Ağır hərbi texnikanın radikalların əlinə keçməsinin qarşısını almaq üçün son 24 saat ərzində İsrail Suriya ordusunun obyektlərinə hava zərbələri endirib. 

“Reuters” agentliyinə danışan mənbələrin məlumatına görə, İsrail Suriya hərbi kəşfiyyatının və gömrük idarəsinin Dəməşqdəki qərargahına, o cümlədən tədqiqat mərkəzinə də zərbələr endirib. İddialara görə, həmin mərkəzdə raket layihələri üzərində işləyən iranlı mütəxəssislər də çalışır.