ABŞ prezidenti Donald Tramp ölkəsinin Hörmüz boğazına nəzarəti tamamilə ələ keçirəcəyini deyib. 

O, iyulun 13-də sosial media hesabında yazıb ki, boğazdan təhlükəsiz keçidin təmin olunmasına görə digər ölkələr ABŞ-yə ödəniş edəcəklər. 

"ABŞ bundan sonra “Hörmüz boğazının mühafizəçisi” kimi tanınacaq. Lakin bu vəzifəni yerinə yetirməsi müqabilində və ədalət prinsipi əsasında, bu son dərəcə həssas bölgədə təhlükəsizlik və mühafizəni təmin etmək üçün çəkilən bütün zəruri xərclərin əvəzini almaq məqsədilə, daşınan bütün yüklərdən 20% həcmində ödəniş alacağıq. Bu prosesin həyata keçirilməsinə və təşkilinə dərhal başlanılacaq", - o qeyd edib. 

Tramp "20 faiz" dedikdə nəyi nəzərdə tutduğuna aydınlıq gətirməyib. CNN-ə danışan analitiklər deyir ki, burada hər gəmidəki malların dəyərinin 20 faizi, yaxud ABŞ-nin boğazdakı toplam müdafiə xərclərinin 20 faizi nəzərdə tutula bilər. 

"Biz boğazı 50 il mühafizə etmişik, amma buna görə ödəniş almamışıq. Biz insanlarımızı təhlükəyə atmağın bədəlində ödəniş istəyirik", - deyə Tramp sosial media paylaşımından öncə "Fox News"a müsahibəsində deyib. 

Tramp paylaşımında ABŞ-nin daha əvvəl İran limanlarına tətbiq etdiyi blokadanın da yenidən qüvvəyə mindiyini bildirib. 

İran tərəfi ABŞ ilə atəşkəsin pozulması fonunda iyulun 11-dən etibarən Hörmüzü qapalı elan edib. 

İranın xarici işlər naziri Seyid Abbas Əraqçı "X" səhifəsində Trampın digər ölkələrdən ödəniş istəməsinə ironiya ilə cavab verib. 

"ABŞ prezidenti tamamilə haqlıdır. Hörmüz boğazından ticarət gəmilərinin təhlükəsiz keçidini təmin edən hər kəs bu xidmətə görə kompensasiya almalıdır. İran həmişə Hörmüz boğazının mühafizəçisi olub və əbədi olaraq da belə qalacaq. Əlbəttə ki, 20 faiz həddindən artıq çoxdur. Biz daha ədalətli olacağıq", - o yazıb.

Fevralın sonunda ABŞ və İsrailin İrana hücumları başlayandan sonra İran Hörmüzü əksər ölkələrin tankerlərinə bağlayıb. 

İyunun 17-də isə ABŞ və İran arasında münaqişəni bitirmək üçün anlaşma memorandumu imzalanıb. Sənəddə Hörmüzün açılması da nəzərdə tutulsa da, bu yaxınlarda atəşkəsin pozulması ilə boğazdan keçid yenidən bağlanıb.