ABŞ prezidenti Donald Tramp İranla əldə olunmuş razılaşmanın şərtlərinə əməl edilməyəcəyi təqdirdə daha genişmiqyaslı hərbi zərbələrin endirilə biləcəyi barədə xəbərdarlıq edib.

Tramp bildirib ki, Amerika silahlı qüvvələri razılaşma tam icra olunana qədər Yaxın Şərqdə qalacaq.

“Bütün Amerika gəmiləri, təyyarələri və hərbçiləri, eləcə də əlavə silah və sursatlar xeyli zəifləmiş düşmənin təqibi və məhv edilməsi üçün İran ərazisi və ətrafında qalacaq. Bu, əldə olunmuş saziş tam yerinə yetirilənədək davam edəcək”, - o, “Truth Social” hesabında yazıb.

ABŞ və İran aprelin 8-də iki həftəlik atəşkəs barədə razılığa gəldiklərini açıqlayıblar. Tramp qeyd edib ki, Hörmüz Boğazı vasitəsilə gəmiçiliyin bərpası şərti ilə İrana zərbələri dayandırmağa hazırdır. İsrail bu qərarı dəstəkləsə də, atəşkəsin Livana şamil olunmadığını vurğulayıb.

“Tasnim” agentliyinin məlumatına görə, Tehran Vaşinqtona bildirib ki, İsrail Hizbullah qüvvələrinə qarşı əməliyyatları davam etdirərsə, atəşkəsdən imtina edə bilər.

“The Wall Street Journal” yazır ki, Trampın bəzi müttəfiqləri və köməkçiləri onun Tehranla əldə olunmuş “kövrək atəşkəs”i şişirtməsindən narahatdır. Onların fikrincə, İran hələ də Hörmüz boğazında gəmiçiliyi bloklaya və regiondakı ABŞ qüvvələrinə hücum edə bilər.

İran hakimiyyətinə yaxın “Fars” agentliyi isə Tehran tərəfindən hazırlanmış, Hörmüz boğazına nəzarəti də nəzərdə tutan 10 maddəlik planı yayıb. Bununla belə, “The New York Times” Ağ Evdəki mənbəyə istinadən bildirir ki, bu plan Trampın daha əvvəl “danışıqlar üçün əsas” adlandırdığı sənəddən fərqlənir və söhbət iki ayrı sənəddən gedir.

“Radio Farda”nın məlumatına görə, atəşkəs elan edildikdən sonra Hörmüz boğazından keçid məhdud olaraq qalır. AFP isə azı iki gəminin boğazdan keçdiyini, daha birinin isə yolda olduğunu bildirib.

İranın xarici işlər naziri Abbas Araqçı yaxın iki həftə ərzində Hörmüz boğazından sərbəst keçidin “İran silahlı qüvvələri ilə koordinasiya şəraitində” mümkün olacağını açıqlayıb.