Oktyabrın 29-da Bakı Ağır Cinayətlər Məhkəməsində həbsdə olan hüquqşünas və hökumət tənqidçisi Namizəd Səfərovun cinayət işi üzrə növbəti iclas keçirilib.

Hakim Mahirə Kərimovanın sədrliyi ilə keçirilən prosesdə Səfərov bir sıra vəsatətlər qaldırıb.

O, iş üzrə zərərçəkən qismində tanınan Günel Əfəndiyeva barəsində rüşvət vermə faktı üzrə cinayət işinin başlanmasını istəyib. Səfərov həmçinin Əfəndiyevanın və özünün telefonlarının anten dairəsinin müəyyənləşdirilməsi, eləcə də zərərçəkən şəxs qismindən tanınan şəxsin prosesdə iştirakının təmin olunması ilə bağlı vəsatət verib.

Namizəd Səfərovun digər vəsatəti isə ittiham tərəfinin təqdim etdiyi bəzi sübutların sübutlar siyahısından çıxarılması ilə bağlı olub. Hüquqşünas saxlanılarkən, eləcə də ofisində və evində aparılan axtarışların prosessual qanunvericiliyin tələbləri pozulmaqla keçirildiyini iddia edib.

Hakim bildirib ki, bu məsələlərə cinayət işi üzrə sənədlərin tədqiqi mərhələsində baxılacaq.
Növbəti məhkəmə iclası noyabrın 19-na təyin edilib.

N.Səfərov ötən proseslərin birində zərərçəkən kimi tanınan şəxsi tanımadığını demişdi. O, həmçinin saxlanılan zaman yanında olan şəxslərin şahid qismində dindirilməsini və ofisinin yaxınlığındakı təhlükəsizlik kameralarının görüntülərinin araşdırılmasını istəmişdi. Məhkəmə isə həmin vəsatətləri baxılmamış saxlamışdı.

İttiham aktına əsasən, Namizəd Səfərov vəzifəli tanışları vasitəsilə Günel Əfəndiyevanı vəzifəyə təyin etdirəcəyini vəd edib, bu məqsədlə ondan 53 min manat alıb. İstintaqın iddiasına görə, o, vədinə əməl etməyib.

Səfərov ittihamı qəbul etmir. O, ötən ilin dekabrında həbs olunub və Cinayət Məcəlləsinin 178.3.2-ci — külli miqdarda ziyan vurmaqla dələduzluq - maddəsi ilə təqsirləndirilir.

Səfərovun həmsədri olduğu Azərbaycan Xalq Parlamenti cinayət işini “əsassız və siyasi motivli” adlandırıb.
Namizəd Səfərov 2005-ci ildə Vəkillər Kollegiyasından xaric edilib. O zaman bunu kollegiya rəhbərliyini tənqid etməsi ilə əlaqələndirmişdi. Səfərov sonrakı illərdə hakimiyyəti tənqid edən çıxışları ilə tanınıb.