Azərbaycanda 2025-ci ilin mart ayı üzrə inflyasiya 5.9%-ə çatıb. 

Fevralda isə illik inflyasiya 5.5 faiz səviyyəsində idi.

Bu barədə Dövlət Statistika Komitəsi xəbər verir.

Məlumata görə, 2024-cü ilin mart ayı ilə müqayisədə, qida məhsulları, içkilər və tütün məmulatlarının qiymətlərində 6.5 faiz, qeyri-qida məhsullarında 2.8 faiz, ödənişli xidmətlərdə isə 7.5 faiz artım müşahidə olunub. 

Mərkəzi Bank ötən ilin mayından bəri pul kredit siyasətində inflyasiya hədəfini dəyişməyib. 

İnflyasiya faiz dəhlizinin aşağı həddi 6.25%, yuxarı həddi 8.25%, uçot faiz dərəcəsi isə 7.25% müəyyən edilib. 

İqtisadçılar sürətlənən inflyasiyanı ötən il benzin və dizelin və bu ilin yanvarından elektrik enerjisi və qazın qiymətinin artırılması ilə izah edirlər. Belə ki, bu kənd təsərrüfatı məhsullarının yetişdirilməsi, saxlanması və daşınması xərclərini artırır. 

İnflyasiyanı dolayı yolla daha da sürətləndirə biləcək amillərdən biri isə dünya bazarında neftin qiymətinin düşməsidir. 

Azərbaycan iqtisadiyyatı böyük ölçüdə neft gəlirlərindən asılı olduğuna görə, bu, ölkənin büdcə gəlirlərinin azalmasına, o da öz növbəsində manatın dəyərdən düşməsinə səbəb ola bilər. Bu baş verdikdə isə idxal malları bahalaşır və inflyasiya sürətlənir. 

Aprelin 10-una olan məlumata görə, “Brent” markalı neftin bir barelinin qiyməti 60 ABŞ dollarına düşüb.

Bu, son bir ayda 31%, bir həftədə isə 20% azalmadır. 

Azərbaycan hökuməti 2025-ci ilin dövlət büdcəsini hazırlayarkən neftin qiymətini baza ssenari üçün 70 dollar səviyyəsində hesablayıb.

Neftin qiyməti hazırkı tempdə qalmağa davam edərsə, hökumət ya xərcləri azaltmalı, ya da Neft Fondundan büdcəyə transferlər etməlidir. 

Milli Məclisin İqtisadi siyasət komitəsinin üzvü Tahir Mirkişili “Sfera.az” saytına bildirib ki, verilən proqnozlar əsasında hazırda dövlət büdcəsinin icrası ilə bağlı ciddi risklər görünmür.

“Bu ilin 1-ci rübünün dövlət büdcəsinin icra göstəriciləri göstərir ki, hazırda dövlət büdcəsində 1.6 milyard manatlıq profisit var. Azərbaycanın ciddi iqtisadi ehtiyatları var. Hesab edirəm ki, hadisələrin gedişatına uyğun olaraq tarazlayıcı və əlverişli iqtisadi siyasət icra ediləcəkdir”, o deyib. 

İqtisadçılar isə düşünür ki, bu, hökumət üçün həyəcan təbilidir. 

İqtisadçı və Respublikaçı Alternativ Partiyasının sədri Natiq Cəfərli düşünür ki, neftin qiymətinin hətta 60 dollardan aşağı həddə sabitləşməsi yüksək ehtimaldır. 

“Bu, Azərbaycan iqtisadiyyatında problemlər yaradacaq. Hökumət bunu anlamalıdır. Bu fəlakətin gələcəyini gözləmədən addımlar atmalıdır ki, Azərbaycanda normal iqtisadi mühit yaransın. İnsana pis təsir edir ki, Orta Asiya ölkələrinə belə daha çox xarici investor üz tutur. Halbuki Azərbaycanın daha böyük potensialı, loqistik, coğrafi və əhali üstünlüyü var”, o, “Facebook” səhifəsində qeyd edib.