İyulun 30-da Bakı Ağır Cinayətlər Məhkəməsində Azərbaycan Xalq Cəbhəsi Partiyasının (AXCP) üzvü, partiya sədri Əli Kərimlinin ictimai əsaslarla mühafizəçisi olmuş Kənan Zeynalovun (Basqal) işi üzrə sonuncu məhkəmə prosesi baş tutub.

Hakim Mahirə Kərimovanın sədrliyi ilə keçirilən prosesdə partiya üzvünə hökm oxunub.

Hökmə əsasən, Kənan Zeynalov 9 il müddətinə azadlıqdan məhrum edilib.

Dövlət ittihamçısı ona 10 il cəza istəmişdi və iddia etmişdi ki, AXCP fəalına qarşı Anar Rəhimov adlı şəxsə bıçaqla xəsarət yetirməsi barədə irəli sürülən ittiham məhkəmədə təsdiqini tapıb.

Hüquq müdafiəçisi Zəfər Əhmədov “Toplum TV”-yə deyib ki, K.Zeynalov hökmdən əvvəl son sözündə ona qarşı irəli sürülmüş bütün ittihamları rədd edib və bildirib ki, sadəcə AXCP üzvü olduğuna, Əli Kərimlinin mühafizəçisi olduğuna görə cəzalandırılır.

“Biz inanclılar Ramazan ayında adi ağcaqanad dişləyəndə də onu vurmuruq, o ki qaldı, kiməsə bıçaqla xəsarət yetirək. Mən hər kəsin yanında namusuma and içirəm ki, mən o şəxsi vurmamışam. Ümumiyyətlə, məndə heç vaxt bıçaq olmayıb. Hər şeyi buraxıram sizin ədalətinizə”, - Zeynalov son sözündə bildirib.

Hakimin “Bəraət istəyirsiniz?” sualına Kənan Zeynalov belə cavab verib: “Mən sizdən bəraət istəmirəm, mən sizdən ədalət istəyirəm. Əgər ədalətiniz olsaydı, siz elə əvvəldən dırnaqarası zərərçəkmişi də, saxta ifadə verən şahidi də tutub içəri salardınız”.

Ardınca Zeynalovun vəkili Nazim Musayev çıxış edib.

Vəkil ümumiyyətlə məhkəmə istintaqının yekunlaşdırılmasına qarşı çıxıb və vurğulayıb ki, araşdırma zamanı həqiqətin üzə çıxması üçün irəli sürdükləri vəsatətlərin heç biri təmin olunmayıb.

Müdafiəçi ötən proseslərin birində K.Zeynalovu saxlayan üç polis əməkdaşının və cinayət işi üzrə hal şahidi qismində tanınan şəxslərin məhkəmədə dindirilməsini istəyib. Lakin vəsatət təmin olunmamışdı. 

Müdafiə tərəfi bildirirdi ki, ekspert rəyində bıçaqlandığı iddia olunan A.Rəhimovun köynəyinin üzərində üç yanaşı deşik olduğu göstərilib:

"Bu rəyi oxuyanda adama elə gəlir ki, onu səliqəli şəkildə bıçaqlayıblar. Köynək də maddi sübutdur və müdafiə tərəfi olaraq ona baxmaq hüququmuz var. Xahiş edirik, gətirin, ona baxış keçirək, görək, yazılanlar nə dərəcədə həqiqətdir”.

Kənan Zeynalov ötən il martın 22-də həbs olunub. O, Cinayət Məcəlləsinin 126.2.4-cü (xuliqanlıq niyyəti ilə qəsdən sağlamlığa ağır zərər vurma) maddəsi ilə təqsirləndirilir.

Əli Kərimlinin digər ictimai əsaslarla mühafizəçisi Niyaməddin Əhmədov da uzunmüddətli həbsdədir. O, 2021-ci ildə terrorizm ittihamı ilə 13 il müddətinə azadlıqdan məhrum edilib.

AXCP-nin 20-yə yaxın üzvü uzunmüddətli həbsdədir. Onlar ittihamları rədd edir və siyasi fəaliyyətlərinə görə həbs olunduqlarını bildirirlər.