Tehran Xəzər dənizində İran gəmisinə endirilən zərbəyə cavab olaraq Ukraynanın dəniz limanlarından birinə raket zərbəsi endirməyi nəzərdən keçirib.

Bu barədə "The New York Times" (NYT) adı açıqlanmayan rəsmilərə istinadən məlumat yayıb.

Nəşrin yazdığına görə, intensiv diplomatik səylər nəticəsində hazırda vəziyyəti sabitləşdirmək mümkün olub.

Mənbələrdən birinin sözlərinə görə, İranın Ukraynaya simvolik xarakter daşıyan, nisbətən kiçik döyüş başlığına malik ballistik raket atacağı gözlənilirdi. Digər mənbələr isə mümkün hədəfin Ukraynanın Qara dənizdə yerləşən limanlarından biri ola biləcəyini bildiriblər.

NYT qeyd edir ki, İranın Ukraynaya istənilən raket zərbəsi münaqişənin ciddi şəkildə eskalasiyasına səbəb ola və Tehranla Kiyev arasında daha genişmiqyaslı qarşıdurma riskini artıra bilər. Bu, həm də İranın Rusiya ilə müttəfiqliyi fonunda baş verəcək yeni gərginlik kimi qiymətləndirilir.

Nəşrin məlumatına görə, İran rəsmiləri mümkün cavab zərbəsindən sonra gərginliyin azalacağına ümid etdiklərini bildiriblər. Qərb rəsmiləri isə Ukraynanın belə bir hücuma necə cavab verəcəyini əvvəlcədən proqnozlaşdırmağın çətin olduğunu deyiblər.

İran hakimiyyətinə yaxın analitik Mehdi Rəhməti bildirib ki, ölkədə bəzi siyasi dairələr Ukraynaya cavab zərbəsini dəstəkləsə də, digərləri təmkinli davranmağın tərəfdarıdır.

"Ukrayna kiçik və əhəmiyyətsiz ölkə deyil. Onun döyüş təcrübəsi var və ABŞ ilə Avropanın hərbi-texniki dəstəyini alır. Bu müharibədə yeni cəbhə açmaqla heç nə qazanmayacağıq", - deyə Rəhməti bildirib.

NYT əlavə edib ki, hazırkı gərginliyin nə qədər müddət nəzarət altında saxlanılacağı hələ də qeyri-müəyyəndir.

İranın xarici işlər naziri Seyid Abbas Əraqçı iyulun 26-da Ukrayna prezidenti Volodimir Zelenskini Xəzər dənizində İrana məxsus kommersiya gəmisinə hücumda ittiham edib. Onun sözlərinə görə, hücum nəticəsində bir dənizçi həlak olub və Tehran bu addımın "cavabsız qalmayacağını" bəyan edib. Zelenski isə iyulun 25-də Ukrayna ordusunun Xəzər dənizində İrana məxsus hərbi yük daşıyan gəmilərə zərbələr endirdiyini açıqlayıb. Bundan sonra İran Ukraynanın ölkədəki diplomatik nümayəndəsini Xarici İşlər Nazirliyinə çağıraraq ona nota təqdim edib.