Yanvarın 8-də Bakı Ağır Cinayətlər Məhkəməsində hakim Mahirə Kərimovanın sədrliyi ilə “Seçki Müşahidə Alyansı”nın sədri, hüquq müdafiəçisi Məmməd Alpayın işi üzrə hazırlıq iclası keçirilib.

Hazırlıq iclasında anket məlumatları dəqiqləşdirilib, iş üzrə prosessual məsələlər müzakirə olunub.

İclas zamanı dövlət ittihamçısı vəsatətlə çıxış edərək iş materialları ilə tanış olmaq üçün əlavə vaxt istəyib. Vəsatət təmin edilib, iclas təxirə salınıb. Növbəti məhkəmə iclası 22 yanvar 2026-cı il saat 15:30-a təyin olunub.

Məmməd Alpay 14 mart 2025-ci ildə Baş Prokurorluğun əməkdaşları tərəfindən “QHT işi” çərçivəsində saxlanılıb. Həmin gün Binəqədi Rayon Məhkəməsinin qərarı ilə barəsində 3 ay 28 gün müddətinə həbs qətimkan tədbiri seçilib. Həbs qətimkan tədbirinin müddəti sonradan ardıcıl olaraq daha iki dəfə uzadılıb.

Məmməd Alpay iki ayrı cinayət işi üzrə ümumilikdə 11 maddə ilə ittiham olunur.

Ona qarşı “QHT işi”, həmçinin Anar Məmmədli işi üzrə təqsirləndirilən şəxs qismində Cinayət Məcəlləsinin 193-1.3.2 (cinayət yolu ilə əldə edilmiş əmlakın leqallaşdırılması, xeyli miqdarda), 308.2 (vəzifə səlahiyyətlərindən sui-istifadə), 313 (vəzifə saxtakarlığı), 192.3.2 (qanunsuz sahibkarlıq), 193-1.2.2 (cinayət yolu ilə əldə edilmiş əmlakın leqallaşdırılması, təkrar törədildikdə), 193-1.2.3 (cinayət yolu ilə əldə edilmiş əmlakın leqallaşdırılması, qulluq mövqeyindən istifadə edilməklə törədildikdə), 193-1.3.1 (cinayət yolu ilə əldə edilmiş əmlakın leqallaşdırılması, mütəşəkkil dəstə və ya cinayətkar birlik tərəfindən törədildikdə), 206.4 (qaçaqmalçılıq, mütəşəkkil dəstə tərəfindən törədildikdə), 213.2.1 (vergiləri, işsizlikdən sığorta, icbari tibbi sığorta və ya məcburi dövlət sosial sığorta haqlarını ödəməkdən yayınma, mütəşəkkil dəstə tərəfindən törədildikdə), 320.1 (rəsmi sənədlərin saxtalaşdırılması və qanunsuz dövriyyəsi) və 320.2-ci (saxta sənədlərdən istifadə) maddələri üzrə ittihamlar irəli sürülüb.

Onun koordinatoru olduğu Seçki Müşahidə Alyansı hazırda Azərbaycanda fəaliyyət göstərən və seçki monitorinqi ilə məşğul olan az sayda qurumdan biridir.

Hüquq müdafiəçisinin saxlanması 2014-cü ildə Baş Prokurorluğun İstintaq Idarəsində yerli və xarici qeyri hökumət təşkilatları (QHT) ilə bağlı açılmış cinayət işi ilə əlaqəlidir. Bu cinayət işinin 2020-ci ildə bağlandığı və sonra yeniləndiyi bildirilir.