Həbsdə olan talış mədəniyyəti tədqiqatçısı İqbal Əbilovun saxlanıldığı Bakı İstintaq Təcridxanasında (BİT) işgəncəyə məruz qaldığı deyilir.

Bu barədə "Toplum TV”-yə tədqiqatçının atası Şahin Əbilov məlumat verib. Onun sözlərinə görə, İqbal Əbilov bu barədə iyulun 13-də Qaradağ Rayon Məhkəməsində keçirilən məhkəmə iclasında danışıb.

"Oğlum iclasda bildirib ki, iyulun 7-də Yasamal Rayon Məhkəməsinə üzərində istiqlal şairi Əli Nasirin "Millət öz başını itirən günü, qazanır yurdunun ölüm hökmünü" misraları yazılmış köynək geyindiyi üçün cərimə kamerasına ("kars"a) salınıb. Onun qollarını dəmir çarpayıya bağlayıblar, nəticədə bədəninin müxtəlif nahiyələrində göyərmələr və ağır xəsarətlər əmələ gəlib", - deyə Şahin Əbilov bildirib.

Onun sözlərinə görə, işgəncə BİT-in rəis müavini Cavid Güləliyevin rəhbərliyi altında həyata keçirilib:

"İyulun 9-da görüş günü idi, amma bizi görüşə buraxmadılar. Sonra vəkillərimizdən xahiş etdik ki, onlar getsinlər. Lakin vəkilləri də qanunsuz olaraq görüşə buraxmadılar. Bu gün məhkəmədə aydın oldu ki, oğlum işgəncəyə məruz qalıb”.

Şahin Əbilov bildirib ki, iyulun 13-də keçirilən məhkəmə prosesi İqbal Əbilovun Umbakı Penitensiar Kompleksində iradəsi əleyhinə iki dəfə rentgen müayinəsindən keçirilməsi, buna etiraz etdiyinə görə fiziki zorakılığa məruz qalması və etnik mənsubiyyətinə görə ayrı-seçkiliyə məruz qoyulması iddiaları ilə bağlı olub.

"Oğlum rentgen müayinələrinə məcbur edilib. Halbuki həkim rəyinə əsasən buna ehtiyac olmayıb. Bu səbəbdən Penitensiar Xidmətin 14 saylı Müalicə Müəssisəsinin müdir müavini Ramin Əkbərovdan məhkəməyə şikayət etmişdik. Ramin Əkbərov özü iclasa gəlmədi. İclas qapalı keçirildi, valideynlər buraxılmadı. Yalnız vəkilimiz Rövşanə Rəhimli iştirak etdi", - deyə Şahin Əbilov bildirib.

İqbal Əbilovun atası qeyd edib ki, məhkəmə şikayəti təmin etməyib. Onun sözlərinə görə, müdafiə tərəfi qərardan apellyasiya şikayəti verəcək.

İqbal Əbilova ötən il mayın 20-də Lənkəran Ağır Cinayətlər Məhkəməsində 18 il həbs cəzası verilib.

Belarusda yaşayan tədqiqatçı 2024-cü il iyulun 22-də Azərbaycana qohumlarının yanına səfəri zamanı saxlanılıb.

O, Cinayət Məcəlləsinin 274-cü (dövlətə xəyanət), 281.3-cü (dövlət əleyhinə yönələn açıq çağırışlar -xarici təşkilatların tapşırığı ilə törədildikdə) və 283.1-ci (milli, irqi, sosial və ya dini nifrət və düşmənçiliyin salınması) maddələri ilə ittiham olunub. 

İ.Əbilovun Hüquqlarını Müdafiə Komitəsi bəyan edib ki, o, heç bir siyasi fəaliyyətdə iştirak etməyib və onun “yeganə cinayəti” elmi obyektivlik, vicdanlı araşdırma və mədəni irsi qorumaq olub.

Müxtəlif beynəlxalq insan haqları təşkilatları, o cümlədən Birləşmiş Millətlər Təşkilatının məruzəçiləri İqbal Əbilovu “siyasi məhbus” kimi tanıyıblar.