NATO Baltik ölkələrinin hava məkanını patrul edən hərbi hava qüvvələrinin missiyasının statusunu genişləndirir. Yeni qərara əsasən, NATO qırıcılarının pilotları hava məkanını pozan və təhlükə yaradan pilotsuz uçuş aparatlarını, eləcə də hərbi təyyarələri siyasi icazə almadan vurmaq səlahiyyəti alacaqlar.

"NATO Baltik ölkələrinin hava məkanının patrul missiyasını hava hücumundan müdafiə missiyasına çevirir. Bu, Alyansa daha böyük çeviklik qazandıracaq və havadan gələn təhdidlərə daha sürətli reaksiya verməyə imkan verəcək", - Estoniyanın xarici işlər naziri Marqus Tsaxna "X" hesabında yazıb.

Nazir bildirib ki, Estoniyadakı "Əmari" aviabazası bundan sonra NATO-nun rəsmi əməliyyat bazası kimi fəaliyyət göstərəcək.

Estoniyanın müdafiə naziri Hanno Pevkur isə ERR-ə deyib ki, NATO qırıcılarının pilotları artıq hədəfi vurmaq üçün paytaxtdan siyasi təsdiq gözləməyəcəklər.

Onun sözlərinə görə, əvvəlcə komanda mərkəzi radar vasitəsilə uçan obyekti aşkar edəcək, sonra pilot onu vizual şəkildə müəyyənləşdirəcək. Yerdə əlavə zərərin olmayacağı və ya minimum səviyyədə qalacağı təsdiqləndikdən sonra pilot hədəfi məhv etmək barədə müstəqil qərar verə biləcək.

NATO Litva, Latviya və Estoniyanın hava məkanının patrulu missiyasına bu ölkələrin 2004-cü ildə Alyansa qoşulmasından sonra başlayıb. İndiyədək qırıcılar əsasən Rusiya hərbi təyyarələrini müşayiət etmək və müəyyənləşdirmək üçün havaya qaldırılırdı.

Rusiyanın Ukraynaya qarşı genişmiqyaslı işğalından sonra isə Baltik ölkələrinin hava məkanına pilotsuz uçuş aparatlarının daxil olması halları artıb. May və iyun aylarında NATO qırıcıları Estoniya və Latviya üzərində istiqamətini itirmiş Ukrayna pilotsuz uçuş aparatlarını vurublar.

Litva hakimiyyəti Rusiyanı Ukrayna dronlarını qəsdən Baltik ölkələri istiqamətinə yönəltməkdə ittiham edir. Rəsmi Vilnüs hesab edir ki, Moskvanın məqsədi Baltik ölkələrini Rusiyaya qarşı hücumlarda iştirak etməkdə günahlandırmaqdır.

Rusiya Xarici Kəşfiyyat Xidməti may ayında Ukraynanın guya Latviya ərazisindən Rusiyaya zərbələr endirməyə hazırlaşdığını və Baltik ölkələrinin Ukrayna ordusu üçün "hava dəhlizi" yaratdığını iddia etmişdi. Qurum Latviyanı, NATO üzvü olmasına baxmayaraq, "ədalətli cavabla" hədələmişdi. Riqa isə bu ittihamları rədd edib.

Litva prezidenti Gitanas Nauseda bildirib ki, NATO-nun indiyədək həyata keçirdiyi hava patrulu missiyası sülh dövrü üçün nəzərdə tutulub və qırıcılar əsasən insidentlər zamanı təyyarələri müşayiət etməklə kifayətlənirdilər.

Onun sözlərinə görə, hazırkı təhlükəsizlik mühiti artıq sülh şəraiti hesab oluna bilməz. Nauseda vurğulayıb ki, missiyanın statusunun dəyişdirilməsi son dövrlərdə dronlarla bağlı insidentlər fonunda çəkindirici təsir göstərəcək və Litvanın hava hücumundan müdafiə imkanlarını əhəmiyyətli dərəcədə gücləndirəcək.