Aprelin 27-də Bakı Ağır Cinayətlər Məhkəməsində ABŞ-nin "German Marşal Fondu"nun Azərbaycan üzrə məsləhətçisi olmuş Mehriban Rəhimlinin işi üzrə növbəti məhkəmə prosesi keçirilib. 

"Azadlıq Radiosu"nun xəbərinə görə, hakim Namiq Kərimovun sədrliyi ilə keçirilən prosesdə M.Rəhimli təqsirləndirilən şəxs qismində ifadə verib. O, çıxışında ittihamları rədd edib. 

M.Rəhimli vurğulayıb ki, "German Marşal Fondu" ilə 2008-ci ildən xidmət müqaviləsi əsasında məsləhətçi kimi çalışıb. Fəaliyyəti fondun Buxarest ofisinə təqdim edilən layihələrlə bağlı ilkin rəy bildirməkdən ibarət olub.

"İlkin rəydən sonra hər bir layihəni əvvəlcə fondun Buxarest ofisi, daha sonra Vaşinqtondakı baş ofis və İdarə Heyəti təhlil edir və yekun qərar qəbul olunurdu. Mən heç bir müqavilənin tərəfi olmamışam, fond tərəfindən heç bir sənədi imzalamamışam və maliyyənin köçürülməsində rolum olmayıb", - o deyib. 

M.Rəhimli təşkilatdan aldığı maaşlarının vergilərini ödədiyini bildirib. 

O əlavə edib ki, "German Marşal Fondu" uzun illər ərzində Azərbaycanda, əsasən, sosialyönümlü layihələrə, qadınlara dəstək, erkən və məcburi nikahların qarşısının alınması, maarifçilik məzmunlu təşəbbüslərə maliyyə ayırıb. 

"Davamlı və ən irihəcmli maliyyə dəstəyi Autizm Mərkəzinə ayrılıb, eyni zamanda ölkə boyu maliyyə icma quruculuğuna, qadın sahibkarlığına, ekoloji təşəbbüslərə və maarifləndirmə işlərinə yönəldilib. Məsələn, fondun dəstəyi ilə Azərbaycanın ən ucqar kəndlərində 27 kitabxana açılıb", - o qeyd edib. 

M.Rəhimli ifadəsindən sonra dövlət ittihamçısının suallarını cavablandırıb.

Dövlət ittihamçısı ondan müəyyən gəlir müqabilində vətəndaş cəmiyyəti üzvlərinin layihələrinə müsbət rəy verib-vermədiyini soruşub. 

"Azərbaycanda heç kim mənə rüşvət verməyə, bunu təklif etməyə belə cəsarət edə bilməzdi", - M.Rəhimli prokurora belə cavab verib. 

Məhkəmə prosesi mayın 18-ə təxirə salınıb. 

Mehriban Rəhimli Baş Prokurorluqda “QHT işi” ilə bağlı başladılan cinayət işi çərçivəsində ötən ilin mart ayında istintaqa cəlb olunub. Onun barəsində istintaq müddətində polis nəzarətinə verilmə qətimkan tədbiri seçilib.

"QHT işi” üzrə həbslər 2025-ci ilin martında başlayıb. Vətəndaş Hüquqları İnstitutunun rəhbəri Bəşir Süleymanlı, Seçki Müşahidə Alyansının icraçı direktoru Məmməd Alpay və "Hüquq və İnkişaf" İctimai Birliyinin rəhbəri Hafiz Həsənov saxlanılıb. H.Həsənov sonradan ev dustaqlığına buraxılıb. 

Onlara qarşı Cinayət Məcəlləsinin vəzifə saxtakarlığı və qanunsuz pul vəsaitlərini leqallaşdırma daxil olmaqla bir neçə maddəsi üzrə ittiham irəli sürülüb. 

Apreldə isə ictimai fəal Asəf Əhmədov, sosial işçi Zamin Zəki və Əhməd Məmmədzadə də eyni ittihamla həbs edilib. 

İqtisadçı Qalib Bayramov və hüquq müdafiəçisi Nərgiz Muxtarova barəsində polisin nəzarəti altına vermə tədbiri seçilib. Ölkə xaricində olan Sübhan Həsənli və Aytac Ağazadə isə axtarışa verilib.

İstintaqa 100-dən çox şəxs, o cümlədən beynəlxalq donor təşkilatlarının əməkdaşları və bəzi hökumətyönlü QHT rəhbərləri cəlb olunub.