Bir qrup memar memarlıq əsərlərinə “özbaşına müdaxilələr”in qarşısının alınması ilə bağlı Azərbaycan Prezidenti İlham Əliyevə müraciət edib. 

Müraciəti sentyabrın 5-də memar Elçin Əliyev sosial media hesabında dərc edib. Yazılı müraciəti ondan başqa, memarlar Famil Ağayev, Cahangir Axundov, İlqar Bəylərov, Xəlil Cəfərov, Nazim Fərəczadə, Nəriman İmaməliyev, Kamal Musaxanov, Aleksandr Qarber, Sənan Salamzadə və Nazim Vəliyev imzalayıblar. 

“Bu gün elə bir vəziyyət yaranmışdır ki, memarlıq əsərləri faktiki olaraq mülkiyyətçilərin özbaşına müdaxilələri və sonradan aparılan yenidənqurma işləri qarşısında müdafiəsiz qalır. Məsələn, şəhər və yol infrastrukturu elementlərinin zədələnməsinin qarşısı alınır və bu, qanunla müəyyən edilmiş məsuliyyətə səbəb olduğu halda, binanın memarlıq simasının özbaşına dəyişdirilməsi, yeni pəncərə və qapı yerlərinin açılması, eyvanların artırılması və ya dəyişdirilməsi, fasadların yenidən qurulması, layihəyə uyğun olmayan konstruksiyaların quraşdırılması və digər müdaxilələr çox vaxt müvafiq dövlət orqanlarının lazımi nəzarəti və reaksiyası olmadan qalır”, - müraciətdə qeyd olunub. 

Memarlar bununla bağlı qanunvericiliyin mövcud olduğunu xatırladıblar, lakin təcrübədə qanunların işlək olmadığını bildiriblər. 

“Nəticədə son illər bir çox müasir tikililər öz ilkin memarlıq və müəllif simasını qismən itirmişdir. Əgər bu cür təcrübə davam edərsə, haqlı bir sual yaranır: bir neçə onillikdən sonra bu binalar hansı vəziyyətdə olacaq və biz gələcək nəsillərə necə bir memarlıq mühiti miras qoyacağıq?” – deyə memarlar sual ediblər. 

Müraciətçilər məsələ ilə bağlı müvafiq icra hakimiyyəti orqanlarına dəfələrlə şikayət ünvanladıqlarını, lakin nəticə ala bilmədiklərini bildiriblər. 

Memarlar prezidentdən müasir binaların memarlıq simasının qorunması üçün müxtəlif tədbirləri nəzərdə tutan mexanizmin yaradılması barədə tapşırıq verməsini xahiş ediblər. 
İlham Əliyevin sərəncamı ilə 2026-cı il Azərbaycanda “Şəhərsalma və Memarlıq İli” elan olunub. Eyni zamanda, bu ilin mayında Bakıda Ümumdünya Şəhərsalma Forumu keçirilib.