“Amnesty International” beynəlxalq hüquq müdafiə təşkilatının Belçika bölməsi həbsdə olan tədqiqatçı və sülh fəalı Bəhruz Səmədovun azadlığa buraxılması tələbi ilə petisiya başladıb.

Avqustun 28-də başladılan petisiya Azərbaycan prezidenti İlham Əliyevə ünvanlanıb.

Təşkilat Səmədova qarşı irəli sürülən ittihamların siyasi motivli olduğunu və ictimaiyyətə heç bir etibarlı sübutun təqdim edilmədiyini bildirib.

“Amnesty International” həmçinin onun həbsdə olduğu müddətdə fiziki və psixoloji vəziyyətinin pisləşdiyini qeyd edib.

Petisiyada Səmədov azadlığa buraxılanadək onun lazımi tibbi yardımla təmin edilməsi, beynəlxalq standartlara uyğun şəraitdə saxlanılması, müstəqil müşahidəçilərin və Ombudsman nümayəndələrinin onunla görüşməsinə şərait yaradılması tələb olunur.

“Bəhruz Səmədov ağır saxlanma şəraiti ilə tanınan Umbakı Penitensiar Kompleksinin ciddi rejimli həbsxanasına köçürülüb. Onu yeganə sağ qalan qohumu - 83 yaşlı nənəsi Zibeydə Osmanovadan 70 kilometr uzaqlaşdıran bu köçürülmə ilə bağlı şikayəti təmin edilmədikdən sonra Səmədov yenidən aclıq aksiyasına başlayıb.

Umbakı həbsxanasında Bəhruz Səmədova həftədə yalnız iki dəfə telefonla danışmağa icazə verilir. Onun həbsxananın həyətinə çıxmasına icazə verilmir və gündə maksimum iki saat ərzində cəmi bir metrlik balkona çıxa bilir. O, həmçinin televiziya və radiodan məhrum edilib”, - təşkilat vurğulayıb.

“Amnesty International” xatırladıb ki, Bəhruz Səmədov həbsxanadan göndərdiyi müraciətdə beynəlxalq ictimaiyyəti ona dəstək verməyə çağırıb:

“Bu gün insan ləyaqətini müdafiə edən hər kəsə müraciət edirəm: məni tək qoymayın. Bütün mümkün vasitələrlə hərəkət edin. Beynəlxalq həmrəyliyin gücünə qəti şəkildə inanıram. Həyatımı xilas etmək və bu şərə son qoymaq üçün əlinizdən gələni edin”.

Petisiya çərçivəsində 10 min imzanın toplanması hədəflənir.

B.Səmədov daha əvvəl də saxlanma şəraitindən və tibbi xidmətə çıxış imkanlarının məhdudluğundan şikayət edib. O, dar otaqda saxlanıldığını, açıq havaya və Günəş işığına yetərli çıxışının olmadığını, bunun nəticəsində dəri ekzemasının gücləndiyini bildirib. Səmədov gözündəki problemlə bağlı oftalmoloq tərəfindən müayinə olunsa da, ona yalnız göz damcısı verildiyini deyib.

Mayın 21-də Ali Məhkəmə onun qapalı rejimli həbsxanaya köçürülməsi ilə bağlı şikayətini təmin etməyib.

Çexiyanın Karlov Universitetinin doktorantı olan Bəhruz Səmədov Dövlət Təhlükəsizliyi Xidmətinin əməkdaşları tərəfindən 2024-cü il avqustun 21-də həbs olunub.

O, 2025-ci il iyunun 23-də Bakı Ağır Cinayətlər Məhkəməsinin hökmü ilə 15 il müddətinə azadlıqdan məhrum edilib. Sülh fəalı dövlətə xəyanətdə ittiham olunur.

Cinayət işində iddia edilir ki, o, Ermənistan xüsusi xidmət orqanları ilə əməkdaşlıq edib. Özü isə ittihamı qəbul etmir, hakimiyyətin sifarişi ilə cəzalandırıldığını deyir.