“Xeyli sıxıntılı, problemləri bol bir ili - 2024-cü ili geridə qoyuruq. Bu sıxıntılar yalnız özümlə, yaxınlarımla, dostlarımla bağlı deyil. Təəssüf ki, çoxsaylı əqidədaşlarımın, gənc jurnalistlərin, ictimai-siyasi fəal insanların aqibətində yaşanır”.

Toplum TV-təsisçisi, hüquqşünas, media eksperti Ələsgər Məmmədlinin ictimaiyyətə ünvanladığı bayram təbrikində belə deyilir.

O, “məruz qoyulduğum hüquq terroruna görə ruhdan düşmək, ümidsiz olmaq, vaz keçmək xarakterimə ziddir” yazır .

“Tamamilə təqsirsiz olmağıma baxmayaraq 10 aydır qapalı həbsxana divarları arasında sadəcə girovluqdayam. Qapalı şərait olsa da, həbsxana ölkədəki real vəziyyətin tam çılpaqlığı ilə göründüyü, dərk olunduğu arzuolunmaz məkanlardan biridir. Məni yaxından tanıyanlar bilir ki, hansı şəraitdə olsam da, azadlıq və obyektivlik hissimi qətiyyən itirmərəm. Təmaslardan bilirəm ki, bu gün ölkəmizdə həbsdə olan insanların 90%-dən çoxu təqsirsizdir. Normal məhkəmə-hüquq sistemi olsaydı həbsxanalarda minlərlə təqsirsiz insanlar bu məşəqqətli taleyi yaşamazdı”.

Ə.Məmədli daha sonra yazır ki, milli məsələlərdə həmrəy olmaq nə qədər zəruridirsə, fərdi yanaşmalarda plüralist və tolerant olmaq da o qədər zəruridir.

“İnsan olmağın gərəyi düşünməni, bəzən də fərqli düşünməni tələb edir. Ümid edirəm yeni təqvim ilində özü kimi düşünməyənləri "düşmən", "casus","agent" kimi damğalamaqdan hər kəs çəkinər, fərdi düşüncələrə tolerant yanaşar, cəmiyyətdə fikir plüralizmini təhlükə kimi yox, inkişaf üçün zəruri amıl kimi qəbul edər və gerçək milli həmrəyliyin gərəyini yerinə yetirər.

Belə anlaşılır ki, bizi irəlidə bəlirsiz, daha da çox problemlərin ortaya çıxacağı bir il gözləyir. Bu, həm də yeni ümidlərlə dolu bir ildir. Yeni ildə hər birinizə ilk növbədə sağlıq, möhkəm iradə, mətin duruş diləyirəm.

Diləyim heç bir zaman ədalət duyğunuzu, azadlıq hissinizi itirməmək, azad iradənizin bəyanından çəkinməməkdir. Dünyada ən dəyərli hiss insanın azadlıq duyğusudur. Azad insan olmadan, azad cəmiyyət qurula bilməz. Hər birimiz öncə içimizdəki azadlığımızı durduran, boğan "zəncirlərdən" qurtulmalıyıq.

2025-ci ilin hər birimiz üçün yeni fürsətlər ili olmasını arzulayıram. Bizi gözləyən sıxıntılardan qurtulmanın bir yolu da gerçəkdən dayanışma içərisində bir-birimizə dəstək olmaq, anlamaqdan keçir. Hər birinizin dayanışma (həmrəylik) gününü və yeni ilini təbrik edirəm.

Bayramlarınız mübarək!”

Ələsgər Məmmədli bu ilin martında “Toplum TV işi” üzrə həbs edilən 7 nəfərdən biridir.

Onunla yanaşı III Respublika Platformasının spikeri Akif Qurbanov, qurucu heyət üzvü Ruslan İzzətli, Toplum TV-nin videoredaktoru Müşfiq Cabbar, Demokratik Təşəbbüslər İnstitutunun əməkdaşları Əli Zeynal, İlkin Əmrahov, Ramil Babayev həbs ediliblər. İki nəfər Fərid İsmayılov və Elmir Abbasov polis nəzarətinə veriliblər.

Onlar qaçaqmalçılıqda ittiham olunurlar. Özləri ittihamı rədd edirlər, həbslərinin siyasi sifariş olduğunu bildirirlər.

Hüquq müdafiəçiləri ölkədə 300-dən çox siyasi məhbus olduğunu deyirlər.

Azərbaycan hakimiyyəti ölkədə siyasi məhbus olmadığını, heç kimin siyasi fəaliyyətinə görə həbs edilmədiyini, bütün hüquq və azadlıqların təmin olunduğunu bildirir.