"Toplum TV" işi ilə bağlı heç bir yeni əsas, dəlil ortaya qoyulmadan, konsititusiyaya əsaslanaraq (Azərbaycan Respublikasının qanunları Konsititusiyaya əsaslanaraq tətbiq olunmalıdır) heç bir maddə göstərilmədən Ələsgər Məmmədlinin və digər şəxslərin həbs müddəti daha 3 ay uzadıldı.

Bunu Toplum TV-nin təsisçisi Ələsgər Məmmədlinin həyat yoldaşı Günay Məmmədli Facebook səhifəsində yazır.

O qeyd edir ki, bu halda “təqsirləndirilən şəxsin” ( saxta qondarma ittihamlarla) Konstitusiyanın 28-ci maddəsinə əsasən azadlıq, 68-ci maddəsinə əsasən təqsirsizlik prezumpsiyası və 32-ci maddəsinə əsasən şəxsi toxunulmazlıq hüquqları pozulmuş sayılır.

G. Məmmədlinin qənaətincə, bu da o deməkdir ki, ölkədə hüquq sistemi qanunlar əsasında yox, sifariş əsasında fəaliyyət göstərir.

 “Ələsgər Məmmədli məhkəmə zamanı konstitusiyadakı bu maddələrə əsasən öz etirazını bildirib və hüquqlarının pozulması ilə bağlı hazırladığı çıxışı etməyə imkan verilməyib. Ancaq buna baxmayaraq qismən də olsa Məmmədli öz etiraz və iradlarını müstəntiqlərə və hakimə bildirib” – G.Məmmədli yazır və əlavə edir ki, məhkəmədə hakim Sülhanə Hacıyeva Ələsgər Məmmədliyə “Bizdən şikayətiniz varsa üst quruma bildirin” deyib.

Ələsgər Məmmədli isə ona belə cavab verib: “Siz üst qurumla bir-birinizə top ötürməklə və sifarişli qərarlar həyata keçirməklə məşğulsuz. Buna görə də şikayətin heç bir mənası yoxdur”.

Ələsgər Məmmədli bu ilin martında “Toplum TV işi” üzrə həbs edilən 7 nəfərdən biridir.

Onunla yanaşı III Respublika Platformasının spikeri Akif Qurbanov, qurucu heyət üzvü Ruslan İzzətli, Toplum TV-nin videoredaktoru Müşfiq Cabbar, Demokratik Təşəbbüslər İnstitutunun əməkdaşları Əli Zeynal, İlkin Əmrahov, Ramil Babayev həbs ediliblər. İki nəfər Fərid İsmayılov və Elmir Abbasov polis nəzarətinə veriliblər.

Onlar qaçaqmalçılıqda ittiham olunurlar. Özləri ittihamı rədd edirlər, həbslərinin siyasi sifariş olduğunu bildirirlər.

Hüquq müdafiəçiləri ölkədə 300-dən çox siyasi məhbus olduğunu deyirlər.

Azərbaycan hakimiyyəti ölkədə siyasi məhbus olmadığını, heç kimin siyasi fəaliyyətinə görə həbs edilmədiyini, bütün hüquq və azadlıqların təmin olunduğunu bildirir.