Həbsdə olan işçi hüquqları fəalı Ayxan İsrafilov saxlanıldığı 10 saylı Cəzaçəkmə Müəssisəsindəki şəraitlə əlaqədar ictimaiyyətə açıq məktub yazıb. 

"Abzas Media"nın dərc etdiyi məktubda fəal müəssisədə “qorxu atmosferi” formalaşdığını, məhkumların təzyiq altında saxlanıldığını bildirir.

A.İsrafilov, xüsusilə, özünün saxlanıldığı 6-cı dəstənin yataqxanasında ("barak") məhkumların  qeyri-insani rəftara məruz qaldığını yazıb. 

"Səhər 10:00-dan sonra “barak”da işıqlar sönür, jalüzlər bağlanır. “Barak” ala-toranlığa bürünür. Bu qaranlıqda nə bir kitab oxumaq olar, nə də bir krossvord yazmaq. İslah olmaq üçün qeyri-münbit şərait. Söhbət etmək istəsən, gərək pıçıltı ilə danışasan, çünki “starşılar” (məhkumların qeyri-rəsmi başçısı - red.) yatır", - o qeyd edir. 

"İl yarımdır burada qalıram və bura heç vaxt insanın hüzur tapa biləcəyi yer olmayıb. Son 1-2 ay ərzində burada əsl diktatura formalaşıb. Qol gücünə, təhdidlər altında insanların iradəsi sındırılır”, - fəal əlavə edib. 

A.İsrafilov müəssisə rəhbərliyinin bəzi məhkumların köməyilə bu şəraiti yaratdığını deyir. 

"Rəhbərliyin hər yerdə informatorları var. İnformator özü “qoçu” ilə birləşib, bu şəraiti yaradıblar. “Ağa”nın “barak”da etdiyi özbaşınalıq ya ört-basdır olunur, ya da yuxarıya təhrif olunmuş formada çatdırılır. Başçı ilə razılaşmayanları informator rəhbərliyin əli ilə cəzalandırır. Gedib heç yerə şikayət etmək də mümkün deyil. Nəticədə şikayət etmək istəyən özü pis vəziyyətdə qalacaq. Adamlar odla su arasında qalıb”, - o bildirir. 

Onun sözlərinə görə, hazırda “barak”da qorxu hökm sürür:

“Barak qorxu atmosferinə bürünüb. Burada özümü 30-cu illərin SSRİ-sindəki kimi hiss edirəm. Heç kəsin dilinə gətirmədiyi, amma gözlərində aşkar sezilən bir qorxu var. Hər bir fərd başa düşür ki, əgər o “başçı” ilə problem yaşasa, haqlı olub-olmağından asılı olmayaraq, heç kəs ona dəstək çıxmayacaq. Bu da qorxunun durmadan dövr etməsinə və qarşılıqlı etibarın olmamasına gətirib çıxarır”.

Fəal müraciətinin şikayət deyil, xəbərdarlıq olduğunu vurğulayıb. 

“Mən heç bir diktatura ilə barışmaq niyyətində deyiləm və barışmayacam da. Əminəm ki, mənim bu barışmazlığım fiziki konfliktə səbəb olacaq. Bu, qaçılmazdır”, - o qeyd edib.

Ayxan İsrafilov 2023-cü il avqustun 13-də moto-kuryerlərin etiraz aksiyasına dəstək verdikdən sonra narkotik ittihamı ilə saxlanılmışdı.

Ötən ilin aprelində Bakı Ağır Cinayətlər Məhkəməsi onu 3 il azadlıqdan məhrum edib.

May ayında Avropa İnsan Hüquqları Məhkəməsi A. İsrafilovun işi üzrə qərar verərək, onun azadlıq hüququnun Azərbaycan hökuməti tərəfindən pozulduğunu müəyyənləşdirib.

2022-ci ildə yaradılan “İşçi Masası” Həmkarlar İttifaqları Konfederasiyasının dörd üzvü - sədr Afiəddin Məmmədov, eləcə də Ayxan İsrafilov, Elvin Mustafayev və Möhyəddin Orucov hazırda müxtəlif ittihamlarla həbsdədir. Onlar ittihamların qurama olduğunu və siyasi motivlər daşıdığını bildirirlər.